Los llectores d’Asturies.com consideren que los símbolos relixosos nun han de tar n’edificios públicos

Un 73 por cientu de los usuarios que participaron nel nuesu ‘Conceyu Abiertu’ amosó la so disconformidá a la presencia de símbolos relixosos n’edificios públicos. A últimos del pasáu mes de setiembre, l’Ayuntamientu de Llangréu retiró una imaxe de la Virxe d’El Carbayu de la casa conceyu.

Esta decisión llevantó muncha polémica en Llangréu y provocó inclusive momentos de tensión, como nel momentu de la entrega de 5.482 firmes de vecinos contra la decisión del Plenu adoptada con votos a favor d’Izquierda Xunida, Somos Llangréu, PSOE y Ciudadanos. Finalmente, la imaxe retiróse de la entrada de la Casa Conceyu y agora lluz na capiella del asilu de persones mayores de Ciañu.

La entruga que plantegamos en ‘Conceyu Abiertu’ foi ‘¿Habría que retirar los símbolos relixosos de les cases del conceyu?’, a lo qu’un 73 por cientu respondió ‘Sí, nun deberíen tar n’edificios públicos’, por un 27 por cientu qu’escoyó la opción ‘Non, forma parte de la nuesa tradición y trátase de dalgo cultural más allá de la propia relixón’,

Premios Princesa de Asturias

Esti vienres entréguense los Premios Princesa de Asturias y la Fundación entama a lo llargo de la selmana dellos actos protagonizaos polos gallardonaos. Nel nuesu ‘Conceyu Abiertu’ nuevu queremos conocer si los nuesos llectores participen nestos eventos y si-yos presten.