Los llectores d'Asturies.com confíen en qu'otros conceyos sigan el camín de Bimenes y declaren la oficialidá

Un 60 por cientu de los llectores que participaron nel nuesu 'Conceyu Abiertu' confía en que'l pasu dau por Bimenes pa declarar la oficialidá nes sos llendes lleve a otros conceyos a siguir el mesmu camín. Nel 1997 dellos ayuntamientos optaron por esta vía.

El 5 de xunetu d'esi añu Bimenes, baxo'l mandatu de Xuacu García Gutiérrez, facía l'asturianu oficial. Casu, Morcín, Castrillón, Llangréu, Llaviana, Teberga y Llanera facíen depués lo propio, mentes que Ḷḷena, Mieres, Riosa, Ribeseya, Amieva y Corvera manifestáronse a favor de sacar alantre midíes y planes de normalización, y Nava aprobaba unes ordenances d'oficialidá. Sicasí, pronto toes estes declaraciones foron torgaes polos recursos presentaos nel 1998 énte'l Tribunal Superior de Xusticia d'Asturies (TSXA), con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello.

Agora, casi 20 años depués, tres la decisión de Bimenes del 2 de xunetu, los usuarios d'Asturies.com confíen en que los conceyos del país tomen el mesmu camín que'l yerbatu, empezando a declarar la oficialidá nes sos llendes. El 60 por cientu de los llectores que votaron en 'Conceyu Abiertu' confía nello, por un 40 que cree nun se va repetir el casu.

Dende esti momentu yá ye posible votar nun 'Conceyu Abiertu' nuevu. Nesta ocasión queremos conocer la opinión de los nuesos usuarios sobre la suspensión del conciertu de Francisco en Xixón por unos insultos de conteníu machista a Mónica Oltra, vicepresidenta de la Generalitat Valenciana.