Los llectores d’Asturies.com apoyen la regulación de la xuba de vehículos privaos a los Llagos de Cuadonga

Un 73 por cientu de los usuarios d’Asturies.com ve con bonos güeyos la regulación de la xuba de vehículos particulares a los Llagos de Cuadonga y sofiten la so ampliación a tolos periodos festivos y vacacionales del añu pa protexer l’entornu. El Plan Especial de Tresporte actívase namái pa feches determinaes.

Nel ‘Conceyu Abiertu’ queríamos conocer la opinión de los nuesos llectores sobre la reegulación pa xubir a los Llagos depués de los importantes atascos rexistraos na ponte de Tolos Santos. La entruga concreta yera ‘¿Ha d'activase'l Plan de Tresporte a los Llagos de Cuadonga mientres tolos periodos festivos y vacacionales?’, a lo qu’un 73 por cientu respondió ‘Sí, ye necesario pa regular la xuba de vehículos privaos y protexer l'entornu’.

Por contra, un 27 por cientu optó pol ‘Non’ al entender que ‘ye recaudatorio y solucionaríase con un control d'accesu que nun torgue dafechu l'usu de vehículos privaos’. El Plan Especial de Tresporte a los Llagos de Cuadonga nun s’activa en tolos periodos festivos o vacacionales. Asina, nel 2016 entró en marcha na Selmana Santa, la ponte del 1 de mayu y nel periodu del branu que foi del 15 de xunetu al 8 de setiembre, y va facer lo propio ente’l 3 y 11 d’avientu por mor de la ponte ‘la Constitución’.

Dende esti momentu yá ye posible participar nun ‘Conceyu Abiertu’ nuevu. Nesta ocasión entrugamos a los nuesos llectores la so opinión sobre'l resultáu de les eleiciones a la presidencia de los Estaos Xuníos, ganaes pol candidatu republicanu Donald Trump.