Los llectores d’Asturies.com ven posible’l zarru de les plantes asturianes d’Arcelor-Mittal

La desllocalización de les plantes asturianes d’Arcelor-Mittal hacia otros países ye dalgo más que posible pa los usuarios d’Asturies.com. Un 85 por cientu de los nuesos usuarios cree que les plantes de Xixón y Avilés podríen pesllar.
 
Pese a les pallabres tranquilizadores del direutor xeneral de la empresa nel Estáu, José Enrique de la Rubiera, lo cierto ye qu’Arcelor-Mittal yá colocó’l candáu en munches plantes europees y les duldes sobrevuelen per Asturies, como amuesa’l contundente 85 por cientu d’usuarios d’Asturies.com que ve posible’l zarru de les factoríes que tien la firma anglo-india en Xixón y Avilés. Nesi sen, USO anunció recién la posibilidá d’una mengua nueva de plantiya de 1.000 persones pa situar el númberu d’emplegaos en 5.000 y hai duldes sobre les inversiones previstes pola empresa n’Asturies, como la construcción d’unes bateríes de coque nueves en Xixón qu’Arcerlor-Mittal ta acabante de retrasar.
 
Por contra, un 10 por cientu confía, pese a la situación de crisis, que la heredera d’ENSIDESA continúe produciendo n’Asturies. Mentes, un 4 por cientu votó nel nuesu ‘Conceyu Abiertu’ pola opción ‘Nun sé’.
 
Dende esti momentu permanez abiertu un ‘Conceyu Abiertu’ nuevu nel qu’esperamos la participación de los nuesos llectores. Nesta ocasión queremos conocer qué planes tienen pa celebrar el Día de la Nación Asturiana.