Los llectores d’Asturies.com ven con preocupación la medra de la estrema derecha en dellos estaos europeos

Un 66 por cientu de los usuarios d’Asturies.com considera preocupante la medra de la estrema derecha y de los partíos xenófobos n’Europa. Grecia y Francia son los exemplos últimos de la consolidación d’estes organizaciones.
 
Les eleiciones celebraes nos 30 díes últimos nestos dos estaos amosaron una situación que nun ye nueva, yá qu’en Países Baxos o Austria esti tipu de formaciones tienen una representación destacada. Nel casu griegu, Amanecer Dorado, d’ideoloxía neonazi, convirtióse nel sestu partíu más votáu con un 7 por cientu de los votos, resultáu mui superior al de l’anterior cita coles urnes, onde algamó’l 0,3 por cientu del total de sufraxos. Mentes, en Francia, el Front National de Jean-Marie Le Pen consiguió tamién una medra importante cola candidatura encabezada pola so fía, Marine: pasó d’un 10,44 por cientu nel 2007 a un 17,90 por cientu.
 
Esta situación, que según dellos analistes políticos pue medrar enforma más, esmolez a un 66 por cientu de los llectores que votaron nel nuesu ‘Conceyu Abiertu’, por un 20 por cientu que considera esta medra como dalgo normal en tiempos de crisis y qu’estes formaciones nun dexen de representar a una minoría residual. Mentes, un 14 por cientu señala qu’esti panorama que se da en dellos estaos europes nun-y quita’l suañu.
 
Dende esti momentu, los llectores d’Asturies.com pueden votar nun ‘Conceyu Abiertu’ nuevu. Nesta ocasión queremos conocer qué valoración faen de la política llingüística desendolcada por Foro nesta llexislatura.