Los llectores d’Asturies.com ven bien que’l Gobiernu ‘subvencione’ a aerollinies p’abrir rutes nueves

La perda de conexones que ta viviendo l’Aeropuertu d’Asturies nun presta a los nuesos usuarios. El 71 por cientu de los llectores d’Asturies.com vería bien que’l Gobiernu ‘subvencione’ a aerollinies pa l’apertura de rutes nueves.

La llexislación actual nun permite les subvenciones a llinies aérees privaes, pero un vacíu llegal fai que les comunidaes autónomes utilicen dellos medios, como convenios publicitarios, pa treslladar perres a les compañíes y, a cambiu, éstes pasen a operar dende los sos aeropuertos. Asina, Cantabria pagó 16,2 millones en cinco años pola presencia de Rayanir nel so aeropuertu con más d’una quincena de rutes abiertes, al igual que fai Asturies con Easy Jet, anque nesti casu por una cantidá muncho menor, lo que permite a Santiagu’l Monte’l caltener la conexón con London-Stansted tol añu y con Genève en branu.

La consulta fecha nel nuesu ‘Conceyu Abiertu’ señala que’l 71 por cientu de los nuesos llectores vería bien aumentar les perres destinaes pa l’apertura de rutes nueves, mentes qu’un 26 por cientu cree que les perres públiques nun tán pa regalales a les compañíes aérees. Por contra, un 3 por cientu prefier nun opinar.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer qué opinen sobre la situación na que queda la regasificadora d’El Musel tres la decisión del Tribunal Superior de Justicia de Madrid de considerala illegal por tar construyía a menos de 2.000 metros d’un nucleu habitáu.