Los llectores d’Asturies.com opinen qu’ensin xuntanza l'asturianismu nun va algamar representación

El 35 por cientu de los usuarios d’Asturies.com consideren que “se necesita una xuntanza real ente les principales formaciones” asturianistes p’algamar representación. Mentes, el 30 por cientu consideren que l’asturianismu “ta muertu”.
 
El ‘Conceyu Abiertu’ últimu entrugaba a los nuesos llectores sobre l’asturianismu de cara a les eleiciones del 22 de mayu con resultaos más bien pesimistes. El 35 por cientu de los usuarios d’Asturies.com tán seguros de que l’asturianismu “necesita una xuntanza real ente les principales formaciones esistentes pa conseguir resultaos eleutorales”, y un 30 por cientu señalaron que “nun va sacar nada” porque “ta muertu.
 
Por contra, el 27 por cientu son optimistes y consideren posible que l’asturianismu garre protagonismu nestes eleiciones cola presencia de proyeutos políticos nuevos. Otros prefieren dir más despaciu y esperar unos años a la consolidación d’estos proyeutos que nun futuru podríen tener representación na Xunta Xeneral. El 8 por cientu de les persones que votaron en ‘Conceyu Abiertu’ seleicionaron esta opción.