Los llectores d’Asturies.com nun ven bien la cancelación de l’actuación d’Albert Pla en Xixón

Un 55 por cientu de los usuarios d’Asturies.com que participaron nel nuesu ‘Conceyu Abiertu’ amosó la so disconformidá cola cancelación de la función d’Albert Pla en Xixón. El catalán va actuar el vienres en Piedrasblancas.

El 25 d’ochobre taba previsto que’l Teatru Xovellanos acoyera la obra ‘Manifestación’ de Pla, pero unes declaraciones del cantante y actor nel diariu ‘La Nueva España’ llevantó una polémica que llevó al PP a reclamar la cancelación de la función, pidimientu 

que contó col sofitu de Foro. En concreto, el de Sabadell respondió a la entruga ‘¿Usted es partidario de la independencia catalana?’ con un “claro que estoy a favor, ¿quién quiere ser español?”, a la que siguió la cuestión ‘¿No ve que haya otras posibilidades de convivencia al margen de la secesión?’, que Pla resolvió afirmando “no, a mí siempre me ha dado asco ser español, como espero que a todo el mundo. Me gustaría que los catalanes fuéramos independientes y que en Gijón se estudiara el catalán por cojones, igual que nos pasa a nosotros ahora”.

La decisión tomada pol conseyu d’alministración del Teatru Xovellanos, onde namái tán representaos Foro y el PP, nun foi bien vista pa un 55 por cientu de los nuesos usuarios, por un 42 por cientu que sí amosaron la so conformidá cola cancelación del espectáculu ‘Manifestación’. Mentes, un 3 por cientu votó pola opción ‘Nun sé’.

Pese a les presiones del PP, l’alcaldesa de Castrillón, Ángela Vallina (IX), sí que decidió caltener el contratu robláu con Pla pa la so actuación esti vienres, a les 20 hores, nel Valey Centru Cultural de Castrillón, función que tien les entraes escosaes dende hai dos selmanes. Les persones interesaes en presenciar ‘Manifestación’ tovía pueden optar a los tickets que, por llei, han de vendese na puerta’l día del espectáculu. En total, van ser venti les entraes disponibles.

Software en llingua asturiana

Dende esti mesmu momentu, los llectores d’Asturies.com yá pueden votar nun ‘Conceyu Abiertu’ nuevu. Nesta ocasión queremos saber si los nuesos usuarios utilicen nel so día a día software en llingua asturiana, como pue ser Ubuntu, Firefox o Thunderbird, ente otros programes tornaos al nuesu idioma por Softastur.