Los llectores d’Asturies.com nun cuenten con nengún apoyu nuevu al asturianu nel Día de les Lletres

Esti vienres ye’l Día de les Lletres Asturianes y la cercanía coles eleiciones da pa pensar na posibilidá de que dalgún partíu pudiera dar el so apoyu al asturianu aprovechando esta xornada. Los usuarios d’Asturies.com nun son optimistes nesti sen.
 
Un 64 por cientu de los nuesos llectores cree inviable que dengún partíu se posicione mañana a favor del asturianu –al igual que fixo’l mes pasáu Independientes de Asturias (Ideas)– aprovechando la celebración del Día de les Lletres pese a los xiros rexonalistes que tomaron formaciones como Foro Asturias Ciudadano (FAC). Mentes, un 30 por cientu de les persones que votaron nel nuesu ‘Conceyu Abiertu’ sí son optimistes y creen qu’esti vienres podría haber dalguna sorpresa.
 
La tercera opción, el ‘nun sé’, foi escoyida pol 6 por cientu de los nuesos llectores. Mañana, en ‘Conceyu Abiertu’ vamos a plantegar una cuestión nueva, a la que vamos sumar un ‘Conceyu Abiertu’ específicu sobre la cita coles urnes del 22 de mayu nel especial ‘Eleiciones 2011’.