Los llectores d’Asturies.com nun acepten la situación actual de la Llingua Asturiana en Primaria

El 76 por cientu de los usuarios d’Asturies.com cree que cola entrada de la LOMCE l’asignatura de Llingua Asturiana y Gallego-asturiano continúa arrequexada. Agora tien l’alternativa de Cultura Asturiana y suma 1,5 hores a la selmana.

 

Pa los nuesos llectores, la situación nueva de la materia en Primaria nun ye l’afayadiza. Entienden que la decisión de la Conseyería d’Educación, Cultura y Deporte ye insuficiente pal afitamientu del idioma y que l’asignatura debería ser tratada como una más. Mentes, un 24 por cientu considera que ye positiva porque permite l’enseñu de la Llingua Asturiana y el Gallego-asturiano nel so ámbitu, cola alternativa de Cultura Asturiana. Nenguna de les persones que participaron nel nuesu ‘Conceyu Abiertu’ escoyó la opción ‘Nun sé’.

 

L’asignatura de Llingua Asturiana enllenó páxines de periódicos nes dos selmanes últimes por mor de la protesta liderada pol PP pola ausencia d’una segunda llingua estranxera nel currículu, aprovechando la ocasión pa enfrentar esta materia cola d’asturianu. Pa ello, fixo usu d’una campaña de firmes liderada por un padre na web Change.org –que sumaba nesi momentu un millar d’apoyos– col argumentu de que les families nun queríen l’enseñu del idioma del país. La FAPA Miguel Virgós respondió darréu qu’a ellos nun-yos llegara quexa nenguna y, énte los ataques aumentaos por un diariu asturianu, l'Academia de la Llingua Asturiana, sindicatos educativos y coleutivos sociales decidieron movilizase. Al mesmu tiempu, otru padre entamaba una recoyida de firmes pa pidir que l’asturianu tuviera presente en tolos niveles educativos. Ésta lleva anguaño más de 2.000 firmes, mentes que la contraria, pese a llevar una selmana más abierta, entovía nun llegó a esa cifra.

 

Otra manera, dende esti momentu yá ye posible participar nun ‘Conceyu Abiertu’ nuevu. Nesta ocasión queremos saber qué opinen énte los esmolecientes datos demográficos del país.