Los llectores d’Asturies.com faen boicó a les empreses qu'amenacen con pesllar les sos plantes nel país

|

El 84 por cientu de los llectores d’Asturies.com señaló en ‘Conceyu Abiertu’ que fai boicó a aquelles empreses que zarraron les sos plantes nel país o qu’amenacen con facelo. Los trabayadores en llucha salen a la cai’l xueves en Xixón.

La non merca de productos o servicios a les empreses que tienen nes sos planes el zarru de les sos plantes asturianes, o que yá dieron el pasu, ye la forma de respuesta d’una mayoría grande de los usarios d’Asturies.com a esta situación qu’afeuta a cientos de persones nel país. Namái’l 16 por cientu afirma nun facer boicó a les firmes en conflictu llaboral.

Precisamente l’Asamblea de Trabayadores en Llucha tien convocada pa mañana en Xixón una manifestación baxo’l lema ‘'Nin un pieslle, nin un despidu, nin un paráu más n'Asturies', con salida les 18 hores de la planta de Tenneco y pasu, alredor de les 19 hores, per L’Humedal. Esti coleutivu, formáu por emplegaos de 17 empreses en conflictu llaboral (Cocinas Asturianas, Benito Sistemas, CaxAstur, Intoxicados por Mercurio, Subcontratas Hunosa, Cébrano, Mataderu Central, Fundición Nodular, Llavandería de Cabueñes, General Dynamics, Sedes, Coca-Cola, Tenneco, Hotel León, Restaurante El Urogallo, Carteros d'Asturies y Rubiera Predisa), nació cola fin de defender en comuña los puestos de trabayu. ¡Asturies en pie! o Conceyu Abiertu, ente otros, sofiten esta convocatoria, na que s’espera tamién l’apoyu de la ciudadanía.

Otra manera, yá ye posible participar nun ‘Conceyu Abiertu’ nuevu. Nesta ocasión queremos conocer qué opinen los nuesos llectores sobre les consecuencies del conflictu de Crimea tres la decisión de la península y de la ciudá de Sebastopol de pasar a formar parte de la Federación Rusa.

 

Contador Estadistiques