Los llectores d’Asturies.com creen que Rajoy ha de dimitir poles sospeches de corrupción nel PP

El 80 por cientu de los usuarios d’Asturies.com opina que Mariano Rajoy debería de dimitir poles sospeches de corrupción na cúpula del PP. El presidente del Estáu pierde créditu pol casu Bárcenas y los sobres a dirixentes del partíu.

En ‘Conceyu Abiertu’ queríamos conocer si los nuesos llectores creíen que les sospeches de corrupción nel Partido Popular (PP) tres la espublización nel diariu ‘El País’ de dellos papeles del ex tesoreru del partíu Luis Bárcenas nel que se podíen ver dellos pagos a dirixentes del Partido Popular (PP), al paecer en B, deberíen llevar a Rajoy a presentar la so dimisión. El 80 por cientu de los usuarios d’Asturies considera qu’esta polémica sí ye razón suficiente como pa dexar el so cargu, mentes qu’un 18 por cientu piensa lo contrariu y un 3 por cientu prefier nun opinar.

Dende esti momentu yá ta abierta una consulta nueva en ‘Conceyu Abiertu’. Nesta ocasión, tres conocer la intención d’Iniciativa pol Asturianu d’entamar una campaña pa impulsar l’asturianu ente les empreses y el pequeñu comerciu, entrugamos a los nuesos usuarios si tienen en cuenta l’usu del idioma que faen les firmes a la hora de mercar productos y servicios.