Los llectores d’Asturies.com creen que pocos diputaos acudiríen a clases d’asturianu na Xunta Xeneral

La propuesta de dar clase d'asturianu a los parllamentarios na Xunta Xeneral nun tendría munchu poder de convocatoria, según los usuarios d’Asturies.com. Un 56 por cientu cree que namái acudiría “un númberu reducíu” de diputaos.

Iniciativa pol Asturianu foi’l coleutivu que treslladó esta posibilidá a Carmen Sela Fernández, diputada de Foro de Ciudadanos, mientres una aconceyamientu dientro d’un ciclu de reuniones que fixo esta organización colos grupos parllamentarios de la Xunta Xeneral, llamada a la que nun acudió la FSA-PSOE, el PP y UPyD. Sela recibió la propuesta con satisfaición y dende Asturies.com entrugamos en ‘Conceyu Abiertu’ a los nuesos llectores sobre la disponibilidá de los representantes de la ciudadanía nel parllamentu asturianu n’afondar nos sos conocimientos d’asturianu nel mesmu llugar de trabayu. Asina, un 56 por cientu piensa que namái acudiríen a les clases “un númberu reducíu” de diputaos, por un 30 por cientu que cree que nun tendríen enfotu en participar nelles. Mentes, un 10 por cientu piensa que la mayoría de políticos seríen receptivos. Por último, un 3 por cientu optó pola opción ‘Nun sé’.

Dende esti momentu yá se pue votar nun ‘Conceyu Abiertu’ nuevu. Nesta ocasión queremos saber la opinión de los nuesos llectores sobre la repercusión que tendrá la fuelga xeneral celebrada ayeri.