Los llectores d’Asturies.com creen qu’hai tratu de favor de la xusticia española hacia la infanta Cristina

La decisión de l’Audiencia Provincial de Palma de desimputar a la infanta Cristina nun prestó a los usuarios d’Asturies.com. Los nuesos llectores creen qu’hai tratu de favor de la xusticia española hacia la fía del rei Juan Carlos I.

La resolución de xuez Castro que citaba a la infanta Cristina a declarar como imputada pol ‘Casu Nóos’ de corrupción pola apropación de fondos públicos nos que los encausaos principales son el so maríu, Iñaki Urdangarin, y Diego Torres, pese a la oposición de la Fiscalía y el malestar del Gobiernu estatal, baltióla a les poques selmanes l’Audiencia Provincial de Palma col votu a favor de dos maxistraos y ún en contra. Una decisión que pa’l 85 por cientu de los nuesos llectores trátase d’un tratu de favor pa la fía del rei por parte de la xusticia, según los datos que marca’l ‘Conceyu Abiertu’. Mientres, namái un 11 por cientu opina lo contrario y un 4 por cientu optó pola respuesta ‘Nun sé’.

Dende esti mesmu momentu, los nuesos usuarios yá pueden votar nun ‘Conceyu Abiertu’ nuevu. Nesta ocasión queremos saber qué fecha prefieren pa celebrar el Día de la Nación Asturiana: l’actual, el 8 de setiembre y Día de la Santina; o l’alternativa que demanden dellos sectores de la sociedá asturiana, el 25 de mayu, fecha que conmemora la declaración de soberanía de la Xunta Xeneral nel 1808.