El ‘Conceyu Abiertu’ que propunxo Asturies.com nestes selmanes mostró la esistencia de tres corrientes dientro del asturianismu. Per un lláu, la que reclama un proyeutu nuevu y, per otru, les qu’apuesten por confiar nel Bloque-UNA o nel FAC.
 
Al final, la más votada polos nuesos llectores, con un 37 por cientu, foi la que vía necesario “entamar de cero con un proyeutu nuevu y ilusionante” si l’asturianismu quería tener representación na Xunta Xeneral nel 2015. Sicasí, les otros dos opciones averáronse enforma a esi porcentaxe: un 31 por cientu apuesta por buscar una xuntanza de tol asturianismu alredor de la coalición Bloque por Asturies-Unidá Nacionalista Asturiana (UNA) y un 30 por cientu considera que la solución única del asturianismu ye tener pesu dientru de Foro Asturias Ciudadano (FAC).
 
Por último, un 2 por cientu de los nuesos usuarios propón siguir trabayando nel mesmu sen qu’hasta agora como pasu p’algamar la presencia d’asturianistes na Xunta Xeneral. Mañana, en ‘Conceyu Abiertu’, los llectores d’Asturies.com van poder votar una encuesta nueva.