Los llectores d’Asturies.com consideren imposible n'España una consulta como la prevista n'Escocia

Un 68 por cientu de los llectores d’Asturies.com consideren inviable nel Estáu una consulta como la prevista nun futuru próximo n’Alba. El ministru d’Asuntos Esteriores español confirmó hai poco en Londres esta posición.
 
Escocia, onde los nacionalistes del SNP tienen mayoría absoluta, y Londres mostráronse favoratibles a la convocatoria d’un referendum en territoriu escocés pa decidir si la población d’Alba quier la independencia del Reinu Xuníu. Pese a la sorpresa que causa en toda Europa esta cesión de David Cameron, lo cierto ye que la intención del primer ministru británicu ye la de celebrar más pronto que tarde esta consulta p’asegurase la derrota del independentismu escocés, yá que pese a la medra del nacionalismu n’Alba, los datos que manexen en Londres dan el trunfu al non. Asina, el conservador propunxo 2013 pa la votación, fecha que refuga Alex Salmond, primer ministru escocés, que prefier la seronda del 2014 pa ganar tiempu y sumar apoyos a la so propuesta soberanista.
 
Esta consulta, que paez nun tener marcha atrás, nun ye bien vista dende l’Estáu español por entender que podría dar ales a los nacionalismos periféricos. Asina, el ministru d’Asuntos Esteriores, José Manuel García-Margallo, señaló recién nuna visita a Londres qu’un referéndum como l’escocés sería inviable n’España dende’l puntu de vista constitucional. Nel nuesu ‘Conceyu Abiertu’ entrugamos a los nuesos llectores ‘¿qué repercusiones tendría nel Estáu español el referéndum posible d’Escocia sobre la so independencia’, y una mayoría grande, el 68 por cientu, señaló que ‘España enxamás permitiría una consulta d’esti tipu’. Mentes, un 22 por cientu cree que ‘podría abrir un camín que llevara a consultes nel mesmu sentíu en dellos territorios’, y un 10 por cientu marcó la opción ‘Nun sé’.
 
Dende esti momentu, los nuesos usuarios yá pueden votar nun ‘Conceyu Abiertu’ nuevu. Nesta ocasión queremos saber si apoyen o non la convocatoria de fuelga xeneral prevista en tol Estáu’l 29 de marzu.