Los llectores d’Asturies.com apoyen la continuidá de la RTPA, anque con otru modelu de programación

Un 81 por cientu de los nuesos llectores apoyen la continuidá de la RTPA, anque con un modelu de programación distintu al actual. Francisco Álvarez-Cascos quier que l'ente tea xestionáu por una empresa privada en réxime de concesión.
 
Tres l’anuncia del Gobiernu del recorte de 11,3 millones d’euros nes tresferencies presupestaries d’esti añu pa la RTPA –decisión que podría ser revocada pola oposición de camudar el testu refundíu del Rexime Económicu Presupuestariu–, que pa la direición del ente públicu de comunicación podría provocar el cese de les emisiones en feches próximes, abrióse’l debate sobre si FAC buscaba con esta aición el pieslle del ente públicu de comunicación. Por ello, dende ‘Conceyu Abiertu’ plantegamos a los nuesos llectores qué decisión debería tomase sobre’l futuru de la cadena y la gran mayoría, un 81 por cientu, apostó por da-y continuidá a la RTPA, pero con un modelu de programación distintu al actual. Mentes, el 18 por cientu ve nella un gastu y reclama’l so zarru y el 2 por cientu opta por mantener el modelu actual.
                                  
Estos díes, Álvarez-Cascos refugó que tuviera intención de pesllar la RTPA y apostó por que l’ente públicu tuviera xestionáu por una empresa privada en réxime de concesión indireuta mediante concursu. Pa ello, anunció la decisión del so partíu de rexistrar güei na Xunta Xeneral una proposición de llei idéntica a otra del PP presentada nel Congresu, polo qu’espera contar col apoyu de los sos ex compañeros de partíu, mui críticos pol recorte de 11,3 millones d’euros anunciaos pol Gobiernu. Mentes, los trabayadores de la RTPA presentaron güei más de 75.000 firmes d’apoyu al ente na Xunta Xeneral y tienen prevista una manifestación pa les 16.30 hores con salida de la estación de Renfe n’Uviéu.
 
Otra manera, yá ta abiertu un ‘Conceyu Abiertu’ nuevu pa conocer la opinión de los nuesos llectores. Nesta ocasión queremos saber si creen que’l comunicáu de cese de la llucha armada d’ETA significa’l fin de la banda o si ye posible que retomen les armes de nun ver satisfeches les sos peticiones.