Los llectores d’Asturies.com acepten la figura de L’Anguleru

|

Un 54 por cientu de los usuarios d’Asturies.com considera a L’Anguleru como una figura prestosa y una bona alternativa a Santa Claus. Esti personaxe, creáu nel 2008 pola Asociación Cultural Garabuxada, entrega regalos en Nuechebona.

L’Anguleru trátase d’un pescador asturianu d’angula que reside nel mar de los Sargazos –llugar de cría d’esti animal– y viaxa hasta Asturies n’avientu pa llegar a tiempu en Nuechebona pa pescar esti alevín. Coles perres que saque de vender les sos captures, merca regalos a les neñes y neños asturianos que reparte esa mesma nueche. L’Anguleru vien en Navidá porque ye época d’angula y entra nel país pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.

Esti pescador de traxe mariellu ta ganando un güecu nos hogares asturianos con respeuto a Santa Claus, de tradición anglosaxona, y los nuesos llectores recíbenlu bien, anque tovía ye desconocíu pa un 22 por cientu d’ellos, según reflexa’l nuesu ‘Conceyu Abiertu’. Por contra, un 14 por cientu caltién la tradición cristiana de los Reis Magos a la hora de regalar en Navidá, y un 10 por cientu refuga cualquier tipu d’estos personaxes al entender que fomenten el consumismu.

Dente esti mesmu momentu, los usuarios d’Asturies.com yá pueden participar nun 'Conceyu Abiertu' nuevu. Nesta ocasión queremos conocer, énte la polémica pola práutica desapaición del asturianu cola entrada de la Llei Wert, qué papel piensen que va xugar el Gobiernu del país nesti asuntu.

 

Contador Estadistiques