Los italianos Brigan son los ganadores del I Concursu Internacional Uviéu Universu Folk

El tríu italianu Brigan ye la banda ganadora del I Concursu Internacional Uviéu Universu Folk. Una propuesta qu'engloba delles actividaes coles mires de convertir a la capital asturiana nun puntu de referencia pal folk, y que celebra anguaño la so primer edición.

La orixinalidá y la variedá de la so propuesta fueron claves pa la decisión del xuráu, que tamién destacó'l cuidadosu tratu dau a les melodíes orixinales entemecíes colos soníos propios de la so tierra d'orixe (el sur d'Italia), ufiertando asina un repertoriu natural, equilibráu y con credibilidá, sofitáu de la mesma nel agregu de melodíes tradicionales d'otros puntos xeográficos qu'arriquecen y amplíen el so llabor d'espardimientu del folclor universal.

El xuráu del certame tuvo conformáu pol portugués Mário Correia (direutor de Sons da Terra, del Festival Intercélticu de Porto, del Festival Intercélticu de Sendim y del Douro Celtic Fest en Gaia); por Ángel Goyanes (músicu de folk y direutor de la revista “Interfolk”); por Antonio Martínez Corzo (direutor de RCFM Radio Crónica Folk de Mérida, emisora especializada íntegramente en músiques tradicionales del mundu); por Alberto Balboa (coordinador y direutor artísticu del Festival Internacional do Mondo Celta d'Ortigueira – Galicia) y tuvo presidíu pol asturianu Aurelio Argel (direutor del veteranu programa folk “Música pa raptar princeses” nos 40 Principales, collaborador musical nel diariu La Nueva España y otros medios de comunicación especializaos, coordinador y responsable de la publicación y Premios AMAS y del Anuariu del Principáu amás de xuráu del Premiu al Meyor Cantar n´Asturianu y del Concursu Liet International de Llingües Europees Minoritaries).

Brigan ye una nueva agrupación procedente de les rexones de Caserta y Lecce, nel sur d'Italia, compuesta por Francesco Di Cristofaro a los whistles, gaites, flauta irlandesa, acordión, bansuri y voz; Emilio Cozza al tamborín y panderos, darbuka, violín, bodhrán y voz y Danilo Parolisi a la guitarra, bouzouki, mandolina y voz. Na so música recreen la tradición sonora de la so tierra, tantu instrumental como cantada en llingües de la zona o en griegu antiguu, xuniendo ritmos itálicos como la tammurriata o la pizzica col folk célticu del Arcu Atlánticu y fundiéndolos de forma festiva xunto a muñeires gallegues y asturianes, xigues irlandeses o reels escoceses.

El galardón dexará-yos tornar a Uviéu'l 14 de setiembre como grupu convidáu nel conciertu de la mítica banda bretona Gwendal. Va ser unu de los platos fuertes d'esta primer edición d'Uviéu Universu Folk, qu'amás del concursu celebráu nel Teatru Campoamor na fin de selmana de San Xuan yá entamó otros conciertos con gran ésitu, como'l del grupu irlandés Lúnasa.