Los investigadores del 'horru patrón' proponen que los horros s’empleguen como biblioteques o p’agospiu

L'equipu d'investigadores encargaos del proyectu 'Desarrollu d'un modelu de validación y catalogación d'hórros en base al horru-patrón' propón usos nuevos pa esti elementu arquitectónicu asturianu, que diz que podría emplegase como biblioteca o incluso como agospiu pa pelegrinos nel camín a Compostela. El casu ye da-yos un usu a aquellos horros y paneres que nun s'empleguen pa la so función orixinal renovando les sos posibilidaes con funciones d'ociu y cultura qu'ayuden a caltenelos.

L'historiador Gerardo Quirós, ún de los responsables del proyectu, esplicó a l'axencia de noticies Europa Press qu'otru de los oxetivos ye'l de defender l'horru como elementu arquitectónicu construyíu con materiales naturales, qu'aprovecha la enerxía del mediu y que ye un conservador ecolóxicu d'alimentos".. Por ello, anque nun pue considerase como vivienda estable, los investigadores defenden que si pue usase como espaciu pa facer agospiu en periodos curtios, un usu que si ye tradicional nestes construcciones. Otru de los usos que se proponen ye'l de biblioteca, en cuantes que los llibros precisen d'un sitiu secu pa conservase.

Estos usos tán estudiándose dientro del proyectu d'I+D+i que desarrollen investigadores de delles árees de la Universidá d'Uviéu a iniciativa de la empresa 'horru.com', cola collaboración del Gobiernu Asturianu. Quirós sorraya la importancia del proyectu en cuantes que "L'horru hasta agora namás se tuviera en cuenta dende'l puntu de vista etnográficu o cultural. Esti proyectu desborda esi aspectu ensin escaecelu y va más allá, permitiendo afitar los estándares del horru tanto pa construcción nueva como pa la rehabilitación y recuperación de los ya existentes".

El proyectu partió d'una iniciativa de la empresa 'horru.com' nel 2006, cuando presentó la idea del 'horru patrón' en el Muséu del Pueblu d'Asturies de contar con un patrón de midida y evaluación de tolos horros. Dempués d'escoyese como horru estandar ún de los que se guarden en Muséu del Pueblu d'Asturies la empresa planteó un proyectu d'investigación pa diseñar la ferramienta d'ellaboración del patrón de midida. La midición de tolos componentes del horru, l'estudiu de les sos patoloxíes constructives, el diseñu de la ferramienta informática que permitiera convertir tolos datos obteníos y l'estudii del horru como patrimoniu cultural foron les siguientes fases del proyectu, qu'agora va pasar a la fase de prebes práctiques. La idea d'horru.com ye que nel futuru cualquiera pueda solicitar una evaluación del so horru pa conocer cuál ye'l so valor nel mercáu, como podría restaurase o como facer ún nuevu, axustando l'horru a un urbanismu más orgánicu y integrador.