Los indignaos van acondicionar la sede de Salú p’agospiar nella a les persones que sufran desahuciu

El Centru Social Okupáu Autoxestionáu La Madreña, nome que los indignaos punxeron al edificiu que tomaron n'Uviéu, va dar agospiu a les persones que sufran desahuciu. Sedes denunció’l miércoles la ocupación del inmueble.
 
D’esta forma, La Madreña va servir pa ufrir un techu a les persones que, por mor de la crisis económica, pierdan les sos viviendes al nun poder facer frente a los pagos coles entidaes bancaries. En concreto, los indignaos pretenden crear un espaciu cultural y social abiertu a múltiples actividaes, qu'amás torne en centru de desarrollu políticu, autoxestionáu y asamblea. La escoyeta d’esti edificiu por parte del movimientu 15-M uviedín, que ta teniendo’l sofitu de tolos indignaos del país, decidióse por ser "un símbolu de la especulación urbanística, orixe de l'actual crisis".
 
Nun comunicáu, esplicaron que'l Gobiernu d'Asturies vendió "de forma irregular" la parcela a la constructora Sedes pa financiar nel 2007 la compra de les dos ales del edificiu Calatrava a la empresa Jovellanos XXI, "propiedá de dos empresarios multimillonarios, José Cosmen y Alberto Lago". Pa financiar esti "derroche de dineru público" –59 millones d'euros– tornaron trés pareceles públiques en suelu residencial: les conseyeríes de la cai Xeneral Elorza, otra más na cai Uría y l'Institutu de San Llázaru, según el comunicáu. Los 'indignaos' añadieron qu'un informe de la Sindicatura de Cuentes fecháu'l 1 d'Abril del 2009 recueye que'l Gobiernu incumplió la Llei de Patrimoniu, dao que la operación tenía qu'aprobase na Xunta Xeneral, “cosa que nun asocedió".
 
L'edificiu alcuéntrase "puercu y en mala traza", anque ye "aprovechable", dixo ún de los ocupantes del inmueble. Por ello, tán realizando llabores de meyora coles mires d'abrir al públicu "lo antes posible". Tamién aseguraron que van penese en contactu con distintes instituciones y asociaciones de vecinos pa sumar apoyos y materializar la so propuesta. De momento, l’Asociación de Vecinos de Pumarín yá amosó’l so sofitu a la iniciativa del movimientu 15-M.
 
Dende les redes sociales, les persones que tán dientro l’edificiu soliciten collaboración a les persones qu’apoyen la causa pa que tean fuera del edificiu, na cai Xeneral Elorza, faciendo relevos. Tamién necesiten potes, y camping gas y bombones. De momento, La Madreña continúa pesllada.