Los Humanitarios de Samartín convoquen un concursu de monólogos

La Sociedá Humanitarios de Samartín de Morea d'Ayer va caleciendo motores pa una de les fiestes más populares de la seronda astur. Los Humanitarios de Morea tienen esti añu ente les sos actividaes complementaries el Segundu Concursu de Monólogos "Pepe Campo", que se fai en collaboración cola Conseyería de Cultura del Principáu d'Asturies y que ta abiertu a toles persones interesaes, col númberu de trabayos que-yos pete.

600 euros de premiu tán acutaos pal meyor monólogu al paecer del xuráu, que va atender pal valir lliterariu de los trabayos que se presenten y que si fuere preciso podría declarar ermu'l premiu o repartilu ente dellos trabayos. La obra premiada va representase'l día 10 de payares nel actu del Pregón de la Fiesta de Samartín.

Una de les característiques más innovadores de la convocatoria ye que los trabayos presentaos han tratar de temes d'actualidá social, política y cultural.

En versu o en prosa, los trabayos presentaos han tar obligatoriamente en Llingua Asturiana, ser inéditos y tener un llargor máximu de cuatro folios en prosa o d'ente 150 y 200 versos. El plazu de presentación d'orixinales ta abiertu hasta'l 25 d'ochobre y les señes pal unviu postal de los testos son les de "Humanitarios de Samartín" separtáu de correos 8, 33.670 - Morea (Ayer-Asturies). Cada trabayu tien que dir nun sobre zarráu, ensin remite, col orixinal y tres copies, y amás, dientro'l sobre habrá otru sobre onde se conseñen los datos del concursante. Les obres premiaes van pasar a ser propiedá de los Humanitarios, mientres que les copies de les non premiaes nun van devolvese, anque los sos autores van ser llibres d'emplegales como-yos pete.
Más información na web de los Humanitarios