Los grupos que sofitaron el cambiu de la Llei de Montes, merecedores de la XXIV Bullada de Purpurina

|
Quema

La Coordinadora Ecoloxista d’Asturies falló,como ye vezu nel Día los Inocentes, el so antipremiu: la Bullada de Purpurina. Nesta ocasión recayó nos grupos de la Xunta Xeneral que sofitaron la modificación de la Llei de Montes pa nun acotar los montes quemaos al pastoréu, esto ye toos menos Podemos.

L’acta del xuráu del XXIV Bullada de Purpurina entrega’l gallardón “que reconoz el llabor y aiciones d’empreses, instituciones y alministraciones que más se destacaren nel so enfotu contra la conservación de la naturaleza y el mediu ambiente asturianu” a “tolos grupos parllamentarios de la Xunta Xeneral del Principáu d’Asturies qu’apoyen la modificación del artículu 66 de la Llei de Montes y Ordenación Forestal del Principáu d’Asturies pa qu’espresamente nun s’acoten al pastoréu los terrenos amburaos”, recordando qu’esta modificación llegal foi presentada “pol PP, IX y PSOE, y posteriormente sofitada por Foro y Ciudadanos na fase d’enmiendes”. Según apunten los ecoloxistes, con esti cambiu na norma Asturies pasa a ser l’únicu territoriu de la Xunión Europea nel que nun se van acotar al pastoréu les zones quemaes.

La postura contraria a esta midida fecha pública por organismos científicos y universitarios, el Conseyu Forestal y la propia conseyera, María Jesús Álvarez, y el direutor xeneral de Montes y Infraestructures Agraries, José Antonio Ferrera, nun foi recoyida por estos grupos parllamentarios, que “siguen cola so batalla partricular contra los acotaos al pastoréu, tando a piques d’entamar una de les agresiones más graves que se conocen contra’l mediu natural asturianu de los tiempos últimos, yá que, lloñe de reforciar les midíes de llucha contra les quemes forestales, lo que faen ye rebaxales entovía más”.

Restu d'aspirantes

Los otros nominaos que tamién aspiraben a la XXIV Bullada de Purpurina pa soceder nel palmarés del antipremiu a la conseyera d’Infraestructures, Ordenación del Territoriu y Mediu Ambiente, Belén Fernández, yeren Hunosa, Arcelor, EDP-HC y la direutora xeneral de Prevención y Control Ambiental, Elena Marañon.

Comentarios

Dientro d'unos años pidirés perdón los de CEO y munchos más polo que taes faciendo. Prohibir el pastoreu ye lo más importante pal mediu ambiente asturianu, sí señor. Matar les actividaes tradicionales y sostenibles pa protexer el mediu ambiente, nun vamos pidir control de la contaminación nel área central por exemplu.

Contador Estadistiques