“Los gobiernos del PP foron gobiernos pa financiar y dopar al PP de manera illegal”, afirma Llamazares

Gaspar Llamazares demanda una investigación a fondu de los gobiernos estatales del PP tres conocer l’últimu informe sobre Rodrigo Rato de los peritos de la Guardia Civil. El voceru d’Izquierda Xunida (IX) na Xunta Xeneral afirma que “los gobiernos del PP foron gobiernos pa financiar y dopar al PP de manera illegal”.

Según estes investigaciones, el políticu madrilanu d’ascendencia asturiana blanquió dineru mientres ocupaba los cargos de vicepresidente del Gobiernu estatal y de presidente del Fondu Monetariu Internacional (FMI) y facturó 83 millones d’euros a empreses privatizaes al traviés de sociedaes mientres yera ministru d’Economía. “Paez que va escosar la nuesa capacidá de plasmu”, apunta Llamazares, que considera que “nun creo que teamos énte un problema d’inmoralidá personal; va muncho más allá”.

Asina, asegura que “los gobiernos del PP foron gobiernos pa financiar y dopar al PP de manera illegal, y pa facer negociu de persones y personaxes del PP”, al tiempu que demanda “ una investigación a fondu sobre esos gobiernos”. “Ye necesario tomar midíes de rexeneración democrática”, añade Llamazares, qu’adelanta que’l so grupu parllamentariu va priorizar na Xunta Xeneral ente toles iniciatives llexislativas les lleis que tienen que ver con derechos sociales y la rexeneración democrática, como la de reforma eleutoral, les de la oficina anticorrupción y la de tresparencia.