Los gobiernos d’Asturies y Galicia apautaron un garapiellu de midíes a facer en comuña

El cume ente los Gobiernos d'Asturies y Galicia remató ayeri en Compostela. Ente les conclusiones del cume rescampla l'alcuerdu pa una carretera ente l'interior d'Asturies y Galicia, la xestión conxunta de la Ría del Eo y el compromisu pa repetir el cume tolos años. Amás de los alcuerdos concretos, Asturies y Galicia van defender conxuntamente delles cuestiones como que'l modelu financieru del estáu tenga en cuenta les característiques d'espardimientu y avieyamientu de la población, la negociación poles tresferencies de FEVE o que se remate l'autovía del cantábricu.


Los dos executivos gallegu y asturianu quieren que l'Autovía tea entera n'obres nesti 2006, pa lo que van a apertar sobre l'estáu. Al empar, Asturies y Galicia van llevar alantre la construcción d'una carretera interior que va conectar Fonsagrada con Grandas de Salime y Santalla d'Ozcos. Les infraestructures foron les protagonistes del cume, anque les conclusiones del alcuentru ente los executivos d'Areces y Touriño tamién incluyen puntos sobre cultura y turismu, rellacionaos sobremanera cola promoción del camín de Compostela, la "España verde" y la creación de circuitos artísticos; urbanismu, cola xestión integrada de la costa; mediu ambiente, pa lo que se propunxeron delles midíes rellacionaes sobremanera cola potenciación de los valores naturales de la Ría del Eo; Educación; Investigación y Desarrollu; política agrícola y de mediu rural, cola problemática de l fueu como asuntu protagonista y pesca, onde s'apautó coordinar actuaciones y facer un grupu conxuntu de trabayu.

El presidente gallegu Emilio Pérez Touriño definió'l cume como "un finxu históricu" una valoración a la qu'Areces amestó que l'alcuentru se desarrollare con un ambiente mui bonu ente dambes partes.

La web oficial del alcuentru espeya toles conclusiones d'estos dos díes de trabayu, pero solo en castellanu y en gallegu, que ye amás la llingua por defectu de la páxina.