Los funcionarios de Bienestar Social entamen otru ‘vienres prietu’

Los emplegaos de Bienestar Social acudieron per segunda ocasión vestíos de negro al so puestu de trabayu “en señal de llutu pola alministración pública”. Esti martes ta prevista una reunión colos funcionarios de toles conseyeríes.
 
Estos trabayadores decidieron n’asamblea’l 20 de xunetu pasáu entamar esti tipu d’aiciones cola fin de facer visible l’espilfarru tán importante que se ta faciendo n’alministración y pa protestar polos recortes a los funcionarios. Asina, decidieron entamar los ‘vienres prietos’ nel que, amás d’acudir de negro al trabayu, lleven pancartes espublizando la tarea que se fai en cada puestu y nun consumen nengún productu a lo llargo del horariu llaboral. Otres aiciones son la entrega d’un escritu reivindicativu al delegáu del Gobiernu estatal n’Asturies, Gabino de Lorenzo, previsto pa güei, y la busca de la solidaridá de los emplegaos d’otres conseyeríes.
 
Nesi sen, pal martes ta prevista una reunión entre los funcionarios de toles conseyeríes pa facer un frente común. Hai que destacar que l’asamblea de Bienestar Social ta formada polos propios trabayadores, ensin les sigles de nengún sindicatu.