Los fondos documentales de CC OO van ser depositaos nel Archivu Históricu d’Asturies

El sindicatu Comisiones Obreres (CC OO) y la Conseyería d’Educación y Cultura roblaron un conveniu pol que los fondos documentales de la central van depositase nel Archivu Históricu d’Asturies, con sede na cárcel vieya d'Uviéu. Con ello preténdese facilitar l’estudiu y conocencia del pasáu recién del país.

“Esto supón la plasmación d'un oxetivu común, que ye la promoción y proteición de la nuestra memoria histórica. El sindicatu deposita'l so fondu documental pa ponelo a disposición de la información, la investigación y la cultura”, señaló'l conseyeru Genaro Alonso. Esti alcuerdu enmárcase ente los oxetivos del Archivu Históricu d'Asturies como depósitu preferente de tola documentación de la que ye titular o depositariu'l Gobiernu.

“El depósitu garantiza a les xeneraciones vinientes el caltenimientu d'un ricu patrimoniu documental que non sólo cuenta con documentos testuales, sinón tamién con fotografíes, materiales gráficos y audiovisuales, asina como testimonios orales, fontes de suma importancia pa tresmitir información de primer mano”, añadió Alonso.