Los filiales caen de la Copa Federación

|
Sortéu Copa Federación 2018-2019

La midida favorez al UC Ceares, al Avilés y al EI San Martín. Asoléyase'l calendariu de Tercera.

Vetusta y Sporting B nun va competir más na Copa Federación. La midida de dexar fuera a los filiales yá taba prevista, pero finalmente adelántase a esta temporada.

La razón ye que los cuatro semifinalistes de la fase estatal d'esta competición van ganar plaza na Copa, qu'estrena esta campaña formatu. Nella nun pueden participar los filiales o equipos venceyaos, polo que na fase asturiana nin les promeses azules y roxiblanques van poder participar, asina como'l Praviano, que pasó recién a ser un club collaborador del Uviéu.

Los trés beneficiaos, por orde clasificatoriu, son el Ciares, l'Avilés y el Samartín, que conformarán el bombu 3 xunto col Colunga. Los cabeces de serie pasen entós a ser el Caudal, el CD Covadonga, el Llanera y el Llanes, mentes que completen el sortéu, que se va celebrar próximamente, el CD Tuilla, L'Entregu, Mosconia y Condal.

Primer xornada

La Fedeación fixo públicu esta mañana'l calendariu de Tercera División. La primer xornada, que se va disputar la fin de selmana del 25 d'agostu, va contar colos enfrentamientos siguientes:

UD Gijón Industrial-Llanes
Avilés-CD Covadonga
L'Entregu-Condal
Llanera-Caudal
Siero-Tiuya
Mosconia-Samartín
Lealtad-Lenense Proinastur
Vallobín-Navarro
Urraca-Ciares
Colunga-Praviano

Na imaxe, un momentu del sortéu de la edición pasada de la Copa Federación. Semeya propiedá de la Real Federación de Fútbol del Principáu d'Asturies.

Contador Estadistiques