Los ferres mengüen la presencia de gaviotes en vertederu de Serín

Va agora ún añu, l'Ente de xestión de basures d'Asturies Cogersa entamó una técnica nueva al traviés del emplegu de ferres pa espantar a les gaviotes que diben en grandes báramos a comer al vertederu de Serín, onde se centralicen les basures de los mayores conceyos d'Asturies. Según los datos oficiales de Cogersa, de más de 8.800 gaviotes al día pasóse agora a una cantidá d'unes 1300.

L'Ente cuida que con ello va amenorgar tamién el problema de superpoblación de gaviotes que vien dándose de va unos años p'acá en conceyos de la costa como Avilés o Xixón, onde les gaviotes añeren nos teyaos de les cases causando-yos munches molesties a los vecinos, y ello ye qu'acordies colos censos, la población asturiana de gaviotes pasare nes dos décades últimes de 10.000 páxaros a 15.000. El xerente de Cogersa, Santiago Fernández, declaró'l so contentu pol éxitu d'esta midida dempués de que nel vertederu de Serín se probare cuasimente con tolo disponible, dende cañones de gas, alarmes o redes. Incluso la primer esperiencia que se fixere colos ferres fuere un fracasu, ello porque los ferres namás se llevaben a Serín dellos díes concretos y les gaviotes deprendieren que díes yera cuando taben los depredadores nel so comederu favoritu. Agora, la presencia de los ferres ye constante, y con ello les gaviotes yá nun s'alleguen a les instalaciones de Cogersa con tanta facilidá.