Los estudiantes universitarios súmense a la fuelga educativa

|
Sara Combarros Asamblees Abiertes d'Estudiantes de la Universidá d'Uviéu y el Conseyu d'Estudiantes

Centren les sos reivindicaciones pol paru del xueves na baxada de les tases.

La Plataforma pola Educación Pública convoca una fuelga xeneral esti xueves pa la derogación de la LOMCE, contra los recortes na Educación y pol aumentu de les beques, ente otres demandes, baxo'l lema de '9 de marzu, aules vacíes". Les Asamblees Abiertes d'Estudiantes de la Universidá d'Uviéu y el Conseyu d'Estudiantes anunció ayeri'l so sofitu al paru y fai un llamamientu a tola comunidá universitaria pa vaciar les aules y participar na manifestación prevista na Estación del Norte (Renfe) d'Uviéu a les 18 hores.

Amás d'apoyar les demandes de la convocatoria, "na nuesa universidá queremos enfocala, sobre manera, nuna antigua esixencia que queremos retomar con fuerza: la baxada de tases". "Nun creemos xusto que, ente que nos últimos años baxó'l financiamientu de la universidá per parte del Principáu, sían los nuesos bolsos los que sofiten la financiación de la mesma, más cuando a nivel européu ye la norma y non la esceición nun pagar por estudiar na universidá", apunten los estudiantes, qu'añade que 11 países tienen la universidá de baldre.

La baxada de tases foi reivindicación más votada nel referendu estudiantil del añu pasáu, que contó cola participación de 2.500 estudiantes, que desembocó nuna serie de compromisos alquiríos polos candidatos a rector. Asina, Santiago García Granda, l'escoyíu finalmente, comprometióse "a redactar un plan d'amenorgamientu de tases pa los próximos 10 años col horizonte de la gratuidá", apunten los estudiantes, que van aconceyar la selmana qu'entra col máximu responsable de la universidá pa tratar esti asuntu.

D'igual forma, anuncien la redaición d'una Proposición Non de Llei pa presentar a tolos grupos de la Xunta Xeneral pa qu'encamiente al Gobiernu a un amenorgamientu progresivu de les tases universitaries. "Nun creemos que sía verdá que nun esista dineru pa la nuesa educación, que ye'l futuru de Asturies, cuando colos sobrecostos de la variante de Payares podríen financiase 97 años y mediu de matrícules gratuites na Universidá d'Uviéu. Lo que falta ye la voluntá política pa encarar esta tema y por ello queremos qu'esti 9 de marzu se vacíen les aules y s’enllenen les cais d'estudiantes universitarios", afirmen.

Na semeya, la vocera de los estudiantes, Sara Combarros, atiende a los medios.

Contador Estadistiques