Los estudiantes universitarios salieron a les cais d’Uviéu “en defensa de la universidá pública”

Cientos d’estudiantes universitarios movilizáronse esti meudía n'Uviéu pa defender la universidá pública. Les Asamblees d’Estudiantes de la Universidá d’Uviéu convocaron esta manifestación.
 
Los universitarios quixeron asina protestar pol “desaniciu” nel que s’alcuentra la institución , que vien “deriváu, ente otres razones, de l’aplicación del nomáu ‘Plan Boloña’, de la falta de compromisu de les instituciones polítiques y educatives col fortalecimientu del sistema públicu d’educación superior, y de l’aprobación d’una riestra de midíes que namás podíemos calificar gafes pa col alumnáu”, señala’l manifiestu de la convocatoria. Ente éstes midíes tán la xuba de tases de matriculación, la masificación nes aules, les condiciones de permanencia y la non contratación del númberu de profesores necesarios, ente otres.
 
Dende les Asamblees d’Estudiantes de la Universidá d’Uviéu aseguren que van siguir coles protestes hasta que nun se retire’l rexime de permanencia nuevu, s’asegure una revisión de los planes de docencia y el Gobiernu se comprometa a aumentar la financiación a la institución académica.