Los escolinos d’Infantil y Primaria van tornar a les aules el 10 de setiembre

Esti xueves garren les vacaciones los escolinos d’Infantil y Primaria, que yá tienen fecha pa la vuelta a les clases de manera presencial, en grupos de 15 persones y ensin mázcaru hasta los 9 años. Va ser el 10 de setiembre, mentes que los alumnos de Secundaria y Bachilleratu van facelo cuatro díes más tarde.

El cursu 2020-2021, marcáu pola pandemia de COVID-19, llega al so fin cola vista puesta na ‘normalidá nueva’ de cara al siguiente. De momento, yá se conoz el plan del Ministeriu d’Educación y Formación Profesional, alcordáu xunto col de Sanidá, que’l Gobiernu d’Asturies habrá d’adaptar a Asturies, y dende esta mañana la fecha na que van comenzar les clases nel país.

La vuelta a les aules va tener llugar el 10 de setiembre pa los escolinos d’Infantil, Primaria y Educación Especial, mentes que los de Secundaria, Bachilleratu van facelo’l 14 y los de FP, el 18. El final del cursu ta previstu pal 21 de xunu pa los primeros y el 23 pal restu.

Los periodos vacacionales van ser del 23 d’avientu al 8 de xineru, en Navidá; y del 29 de marzu al 5 d’abril, en Selmana Santa. El cursu escolar nos centros educativos va principiar el 1 de setiembre y va finar el 30 de xunu, a esceición de los superiores, que van facelo’l 15 de xunetu.