Los escoceses Rura y los irlandeses BackWest ponen la nota internacional a la Folixa na Primavera

Mieres yá se prepara pa festexar la llegada de la estación nueva. Celebra un añu más la Folixa na Primavera, eventu qu’axunta música, gastronomía y tradición que nesta ocasión va contar cola presencia de Spanta la Xente, los escoceses Rura, los irlandeses BackWest y el cántabru Nando Agüeros.

El vienres va celebrase’l ‘chupinazu’ nel Parque Xovellanos, epicentru de la fiesta, a les 19.10 hores. Esti momentu va dar comienzu a una celebración de trés díes na que la sidra ye la gran protagonista, col repartu de más de 3.000 llitros de sidra de baldre, tres mercar el vasu del certame, mientres tola fin de selmana, espichándose los toneles a les 19.15 hores.

Alberto Cienfuegos ‘Michel’, presentador del Concursu Cuenca del Caudal de Canción Asturiana, va encargase esti añu de lleer darréu’l pregón, mentes que Xuan Nel Espósito va recoyer el XIX Distintivu a la Investigación Folclórica ‘Fini Suárez’ “pol su trabayu como recuperador de la curdión y pieces tradicionales pa esti instrumentu”. El festival de tonada y la Banda de Gaites Villa de Mieres van abrir les actuaciones musicales nuna primer xornada que van zarrar Agüeros (23 hores) y la banda irlandesa de folk BackWest (1 hora), que ta de xira de presentación del so segundu discu, 'Heritage hall', asoleyáu en xunu.

El sábadu, a les 19 hores, va tener llugar l’Amuesa de Bandes de Gaites, cola participación de Villa de Mieres y El Gumial na plaza de la Casa Conceyu. Yá de nueche, a les 23 hores, va ser el turnu de Spanta la Xente, pa depués dar pasu a Rura.

Los escoceses son una banda folk mui bien valorada nel so país y a nivel internacional con trés discos al llombu, l’últimu, ‘In praise of home’, asoleyáu l’añu pasáu. Gaita escocesa, whistle, flauta, violín y bodhrán xúnense a la voz y guitarra d’Adam Holmes p’ambientar la nueche mierense del sábadu, que se va pesllar cola interpretación de la Danza d’Oñón.

Menú gastronómicu

La Folixa na Primavera complétase na so estaya gastronómicu con un menú compuestu por sopa d’ablanes o menestra del tiempu, de primero; bacaláu o cabritu, de segundo; y borrachinos o sorbete de sidra, de postre, que se sirve hasta’l domingu, día caberu de la fiesta. Ésti va tar disponible en 14 restoranes del conceyu.

Na semeya, Rura.

PROGRAMA DE LA FOLIXA NA PRIMAVERA

Vienres

• 18 hores: esposición 'Etnografía asturiana: traxes y preseos', hasta'l 31 de mayu na Biblioteca Pública de Mieres.
• 19.10 hores: chupinazu d’aniciu de la Folixa na Primavera nel Parque Xovellanos.
• 19.15 hores: espiche de les pipes de sidra.
• 19.30 hores: pregón oficial de la Folixa por Alberto Cienfuegos 'Michel'.
• 19.45 hores: entrega del XIX Distintivu a la Investigación Folclórica 'Fini Suárez' a Xuan Nel Expósito.
• 20 hores: Festival de Tonada, con Sandra Álvarez Díaz, José Manuel Collado, Patricia Pariente y José Manuel García, acompañaos a la gaita por Ricardo Soberado y Víctor Manuel Álvarez González.
• 21 hores: Alcuentros col Folclor (actuación de la Banda de Gaites Villa de Mieres) nel Parque Xovellanos y cantares de chigre 'Tonada, gaita y pendereta' na Sidrería Barolaya y Plaza San Xuan (El Requexu).
• 21.30 hores: cantares de chigre 'Tonada, gaita y pendereta' na Sidrería Solana y Sidrería Vinoteca Mieres.
• 23 hores: actuación de Nando Agüeros nel Parque Xovellanos.
• 01 hora: actuación de BackWest (Éire).

Sábadu

• 09.05 hores: venta tol día de la Bolla de la Folixa, a cargu la Hermandá de Festexos San Bartolomé de Baíña, na carpa la fiesta nel Parque Xovellanos.
• 12 hores: actuación del Grupu de Baiḷḷe Ruxidera y darréu, a les 13.30 hores, nes cais Ayer y Fonte Les Xanes.
• 12.05 hores: espiche de les pipes de sidra.
• 13.30 hores: conciertu nel auditoriu del Parque Xovellanos de la Banda Sinfónica del Ateneo Musical de Mieres y de les bandines Los Gascones nes cais La Vega y F. Cabezas, y Xarangana na cai Jerónimo Ibrán.
• 17 hores: taller de xuegos y deportes tradicionales asturianos pa neñes y neños a cargu de 6 Conceyos.
• 18 hores: pasucáis y darréu actuación del Grupo de Danzas Virgen de las Gauas, de Tardajos (Burgos), y L’Artusu, con aniciu n'El Requexu y percorríu peles cais Carreño Miranda y Ayer pa finar nel Parque Xovellanos.
• 18.30 hores: espiche de les pipes de sidra.
• 18.35 hores: corchada tradicional de sidra por L’Artusu.
• 18.50 hores: Alcuentros col Folclor (actuación del Grupo de Danzas Virgen de las Aguas y L'Artusu).
• 19 hores: Amuesa de Bandes de Gaites, con Villa de Mieres y El Gumial. Concentración na plaza de la Casa Conceyu pa darréu actua en delles cais de Mieres.
• 23 hores: actuación de Spanta la Xente nel Parque Xovellanos.
• 01 hora: actuación Rura (Álba).
• 02.45 hores: interpretación de la Danza d’Oñón.

Domingu

• 09 hores: venta de la Bolla de la Folixa (na carpa la fiesta, El Requexu, Liceo y la plaza).
• 12 hores: espiche de les pipes de sidra.
• 12.05 hores: actuación del Grupu Folclóricu Prau Llerón y darréu, a les 13.30 hores, na plaza San Xuan.
• 13 hores: deporte tradicional asturianu.
• 13.30 hores: actuación de les bandines El Busgosu, nes cais La Vega y F.Cabezas, y Los Gascones, na cai Jerónimo Ibrán.
• 13.35 hores: teatru na cai con 'Sefiní', de Trapu Zaharra, nel Parque Xovellanos.