Los equipos asturianos de Segunda B, perxudicaos al pasar al grupu 1

|
Grupu 1 Segunda División B 2019-2020

Van competir con baleares, madrilanos, gallegos, Las Palmas Atlético y Melilla.

La opción más dañible pa los clubes afeutaos y la más sorprendente de les plantegaes pa la composición de los cuatro grupos de la Segunda División B foi la que resultó finalmente escoyida en votación pola Comisión de Segunda División B y Tercera División de la Real Federación Española de Fútbol (RFEF), formada por representantes de les territoriales, siendo l'asturianu el sportinguista José María Meana Acebal, encargáu de Loxística y Instalaciones de la Escuela de Fútbol Mareo, y de los clubes. El caltenimientu de tolos equipos d'una mesma comunidá autónoma nun mesmu grupu foi'l criteriu que más pesó, provocando que los equipos asturianos pasaran del 2 al 1.

Asina, l'UP Langreo, el Marino, el Sporting B y el Vetusta van tener que garrar l'avión, a pesar de les llacerioses conexones esistentes dende Asturies, pa viaxar trés vegaes a Illes Balears, una a Canarias y otra a Melilla. Mentes, habrán de facer siete viaxes llargos a Madrid y cuatro a Galicia, trés de los mesmos a Pontevedra.

A les molesties de los viaxes, col costu que suponen a pesar de tar subvencionaos pola RFEF los viaxes n'avión, ta tamién la perda de perres pola visita d'aficionaos rivales. L'añu pasáu los asturianos tuvieron xunto colos cántabros –que nun tienen nengún representante esta temporada na categoría–, vascos, navarros, rioxanos y el Mirandés, únicu equipu de la territorial castellano-lleonesa nel 2, yá que'l restu taben nel 1.

 

Contador Estadistiques