Los editores asturianos creen la FEA, feria que programa n’Uviéu 40 presentaciones y firmes

|
Cartelu FEA

La uvieína plaza de Trascorrales va acoyer esta fin de selmana a 27 editoriales asturianes que van presentar el so catálogu. Celébrase la primer edición de la Feria de la Edición Asturiana (FEA), con unes 40 presentaciones y firmes programaes del vienres al domingu nes que la lliteratura n’asturianu tien una importante presencia.

El Gremiu d’Editores d’Asturies ye la organizadora d’esta iniciativa que llega a Uviéu cola intención d’afitase como un gran escaparate de la producción lliteraria asturiana. Va inaugurase mañana a les 13 hores, xornada na que va tar abierta hasta les 21 hores, mentes que’l sábadu l’horariu va ser de 11 a 21 y el domingu, de 11 a 17.

La producción en llingua asturiana va tar mui presente na programación de la FEA. Asina nel primer día d’actividá van presentase ‘Volvemos en 6 minutos’, de Diego Solís (16.45 hores); ‘Vincitur inimicus’, de Xandru Martino (17.15 hores); y ‘Vikingos: 2035’, d’Abel Martínez (19.15 hores), amás de celebrase la mesa redonda ‘La colección Calume d’Ediciones Trabe: un apueste pola traducción al asturianu’ (18.45 hores), moderada pol so direutor, Rafael Rodríguez Valdés, y una entrevista cruciada ente Xuan Cándamo y Francisco ‘Paco’ Álvarez entitulada ‘Aú vas, ¿Asturies?’ (20.15 hores).

Pal sábadu Víctor Suárez va falar sobre la so traducción ‘Roméu y Xulieta’ (13 hores), Daniel García Granda del Premiu Fernán-Coronas del 2021 ‘Rosada 3.0. Monólogu interior con alumnos al fondu’ (13.30 hores) y Xuan Trenor de ‘Lloñe, niundes’ (17 hores). A les 18 hores, mentes, la III Premiu Nacional de Lliteratura Asturiana, Lourdes Álvarez, va tar acompañada d’Ángeles Carbajal pa dar a conocer ‘Coles señes del agua. Poesía reunida (1990-2018)’.

Xesús González Rato va pesllar el domingu la FEA cola presentación de la so torna ‘El xuegu d’Ender’ (16 hores). Pela mañana, a les 13 hores, David Castañón va tar firmando ‘Les Farturrutes’.

AdxuntuTamañu
Image icon Programa FEA1.67 MB
Image icon Cartelu FEA40 KB
Contador Estadistiques