Los ecoloxistes quieren debatir sobre'l consumu de corriente

Les organizaciones ecoloxistes más importantes del estáu, Greenpeace, WWF/Adena, Amigos de la Tierra y Ecoloxistes n'Acción denunciaron l'actitú del Gobiernu na preparación de la Estratexa d'Eficiencia Enerxética. Les cuatro organizaciones mandáron-y un escritu al Ministru d'economía Rodrigo Rato quexándose porque'l gobiernu entovía nun-yos permitiere participar nel procesu consultivu sobre l'anunciada Estratexa desque'l Secretariu d'Estáu d'Enerxía, José Folgado, presentare'l bocetu de la mesma en xunu.



Anque d'aquella Folgado prometió que fiba consultase coles organizaciones ecoloxistes, estes dicen que'l Ministeriu sigue ensin contactar con elles, anque sí que lo fizo colos sectores particulares interesaos nel tema, casu de les compañíes y distribuidores eléctricos. El responsable de la campaña d'enerxía llimpio de Greenpeace, Luis García Ortega, dio datos sobre la importancia que tien l'iguar una Estratexa d'Eficiencia Enerxética real y efectiva, y esplicó qu'España, al revés que los demás países europeos, ye l'únicu estáu en que xube'l consumu de corriente en rellación a la producción. Según Greenpeace, España consumía en 1998 un 26% más de corriente por unidá de PIB que nel añu 1972, cuando nel mesmu periodu los países de la OCDE baxaron esa rellación nun 28%. La cuenta de la corriente ta acelerándose peligrósamente, como indica que de va diez años p'acá, con una población muiestable, el consumu d'ellectricidá xubiere'l 38%

Aparte del evidente incumplimientu del Protocolu de Kioto, esta situación pue obligar d'equí a unos años a que l'Estáu tenga que gastar perres en mercar derechos d'emisión de gases contaminantes a otres potencies que fueren a menguar les sos emisiones. Contra esti panorama, les organizaciones ecoloxistes proponen, ente otres midides, la creación de Programes de xestión de la demanda, incentivación de les calefacciones particulares a gas natural contra la calefacción eléctrica, retirada de los planes de centrales térmiques a gas, la subvención pública para instalación de colectores solares térmicos o la meyora d'eficiencia del alumbrao público.