Los ecoloxistes proponen que'l parque natural de Ponga dea trabayu a los sos habitantes

Tres d'aprobase la selmana pasada en Conseyu de Gobiernu la creación del Parque Natural de Ponga, el quintu xestionáu pol Gobiernu asturianu, la Coordinadora Ecoloxista Asturiana presentó un escritu d'alegaciones nel que reclama dellos cambeos sobre'l Plan Xestor del Parque.

Ente estes propuestes, pídese que se-y dea mayor competencia a la Xunta del Parque, únicu órganu del mesmu onde va haber participación ciudadana. El repartu de la riqueza xenerada pol Parque ye otra de les peticiones del grupu conservacionista, que llamenta que'l desarrollu económicu nos Parques Naturales asturianos céntrase dafechu nel sector servicios y el turismu pero nun ye a torgar el despoblamientu de los pueblos y llugares inxertos nos parques. Pa iguar esta situación, la Coordinadora propón que se lleve alantre un programa de "microcontratos" pal caltenimientu de les infraestructures y servicios del Parque pol que se-yos encargue a los profesionales que vivan nel parque'l curiáu de caminos, fontes, aparcaderos y otros y tamién que se contrate con ellos dellos llabores de guardería, sociales y de tresporte de manera que sían actividaes complementaries coles qu'aumentar y diversificar la so renta.

Pa meyorar el caltenimientu del parque, los ecoloxistes piden que les cortes de madera que se consientan en parque sían pol métodu de la entesaca y non pol del desaniciu de faces enteres, que se prohiba'l facer carreteres nueves dientro del parque y que se llende'l tope de places que puen tener les cases d'aldea y hoteles inxertos en parque pa torgar la masificación, neto que prohibí-yos a los visitantes l'accesu a les zones d'usu restrinxíu del parque.