Los ecoloxistes piden un usu racional del allumáu de navidá

Anque entovía falten unos díes pa qu'entamen oficialmente les fiestes de navidá, dende últimos del mes pasáu les cais de les ciudaes asturianes yá tan adornaes col tradicional allumáu de navidá. La organización Ecoloxistes n'Acción d'Asturies pidió-yos a los ciudadanos, comerciantes y autoridaes que reflexonen sobre'l gastu importantisimu de corriente que suponen estes lluces, que, aparte de que-y cuesten un bon picu al recibu de la luz de cada conceyu, contribuyen a que se consuma electricidá que se produz a partir de recursos contaminantes.

Pa menguar esti dañu, los ecoloxistes asturianos dicen que'l meyor regalu de Navidá que-yos puen facer los conceyos a los ciudadanos ye'l de menguar el marafundiu de corriente que se da nestes feches y pa ello proponen que l'allumáu de navidá nun se prenda mas de 18 díes y que nun tea encesu más de cuatro hores al día. Calcúlase que cerca del 30% del gastu n'electricidá de los ayuntamientos va pal allumáu públicu, un gastu que crez nestes feches del añu, ello col agravante de que les lluces de navidá funcionen mayormente con bombilles incandescentes, que son les que más corriente gasten.