Los ecoloxistes piden que’l puertu d’Avilés faiga una ampliación que respete la Ría

El Colectivu Ecoloxista d'Avilés compareció en periodu de consultes previes a la Evaluación d'Impactu Ambiental pal Proyectu de desarrollu portuariu de la Ría d'Avilés na marxe derecha de la mesma que propón el Ministeriu de Mediu Ambiente.

Los ecoloxistes piden que l'ampliación se faiga pero menguando la obra que propón el Puertu d'Avilés, en cuantes que'l proyectu de l'autoridá portuaria, al paecer de los conservacionistes "daña intencionadamente'l valor ambiental d'una parte significativa del ecosistema de marisma que ta frente por frente colo qu'agora ye la rula". Los ecoloxistes sorrayen como esti resclavu d'unes antigües marismes de muncha mayor potencia lleven años calteniéndose nuna sablera d'unes 8 hectárees, ello cola gran contaminación y perda de calidá ambiental que carez la ría avilesina dende va décades.

Amasueles, cámbaros, xorra y otres especies de más calibre como aves migratories de distintes especie y rapaces viven nesti llugar agora amenazáu pola espansión del puertu avilesín, una ampliación a la que los ecoloxistes tampoco nun-y ven encontu en cuantes que ta faciéndose la del Puertu del Musel en Xixón, que va poder encargase de los tráficos de graneles que se tienen previstos n'ampliación. Otramiente, el grupu de defensa del mediu ambiente critica que se quiera facer la descarga d'estos graneles en Raíces, lo que podría llevar más povisa y polvu al centru urbanu d'Avilés, que ta a mui poca distancia. Pal grupu ecoloxista, ye abondo con que se reaprovechen
los 1123 metros d'atraque d'ENSIDESA y los 133 metros d'Inespal-Alcoa colo que namás-y ven xacíu de tolo que se propón al replantegamientu del muelle d'Inespal pa ganar 400 metros .