Los ecoloxistes denuncien el refuxu del Meicín per quinta vegada

La selmana pasada echó a andar la obra de demolición del antiguu abellugu del Meicín, primer pasu pa la realización d'un de los proyectos más vieyos de la Dirección de Deportes, la creación d'un albergue de montaña na Vega del Meicín, na fastera del macizu de les Ubiñes, en Conceyu L.lena. Esti proyectu que tien el preste de la Federación de Deportes de Montaña y la oposición de los grupos ecoloxistes y les más de 1.000 alegaciones que se presentaron nel so día al proyectu sigue siendo oxetu de polémica.

Ello ye que la plataforma pa la Defensa d'Ubiña emitió ayeri un comunicáu pidiendo la suspensión de la obra teniéndose pa ello en dellos argumentos de distintu calter. La primera de les quexes vien pola apertura d'una pista pal tresporte de materiales y vehículos dende Tuiza Riba hasta la Vega de Meicín. Según los conservacionistes, esta pista que nin siquiera venía en proyectu ye illegal dafechu en cuantes que taba previsto que los materiales se carretaren n'helicópteru como se fexo n'otres ocasiones.

Amás del fechu de qu'esta pista pasa per zona protexida por ser d'interés oseru y llugar protexíu pa l'avifauna, la plataforma denuncia que'l proyectu del refuxu nun tien declaración d'impactu mediuambiental, trámite imprescindible que sí se fizo colos cuatro proyectos anteriores que presentare'l Principáu y que se refugaron sucesivamente dende distintes autoridaes. Ye esta una llarga historia qu'entamó nel añu 2002 cuando la obra del primer proyectu quedó anulada por incumplir delles normes mediuambientales y nun presentar estudiu d'impactu. Asina foi que en xunu d'esi mesmu añu la tramitación del edificiu entamó otra vuelta partiendo dende cero, pero una nueva alxudicación n'ochobre del 2.002 volvió a anulase tamién por incumplimientu de normes mediuambientales. Enantes d'acabar el 2002, la obra salió a licitación por tercer ocasión, yera'l 2 d'avientu, pero de la tercera tampoco nun diba dir, y el mesmu día 13 anulábase otra vegada. Un añu dempués, l'albergue del Meicín paecía que quedare pa prau, pero'l 16 d'ochobre del 2.003 volvía a falase del refuxu de montaña, que salía a licitación por cuarta ocasión el 6 de payares. La obra llegó a alxudicase a la empresa Ibersilva, pero les alegaciones de grupos ecoloxistes y montañeros yá apuntaben lo que dempués diba sancionar la Comisión d'Urbanismu y Territoriu del Principáu: el proyectu que se presentaba nun cumplía con delles normes d'ordenación urbana, sobremanera cola de l'altura, y ye que l'edificiu que se contaba poner yera de trés pisos. Ello y el dictame del Estudiu d'Impactu Ambiental, que calificaba de "severu" l'efectu del edificiu na vega, llevó a la CUOTA a dar un informe negativu que cayó como una llábana en proyectu.

Yá nel momentu de la denegación del cuartu proyectu los grupos ecoloxistes alvirtieron de que'l Principáu preparaba un quintu que pa poder cumplir cola llei diba tener menos altura pero más metros de planta, colo que'l resultáu final diba ser el d'un edificiu col mesmu volume y, polo tanto, igual d'agresivu cola rodiada, cosa que se confirmó.

La plataforma ecoloxista na que tan presentes Colectivu Montañero pola Defensa de los Picos d'Europa, Coordinadora Ecoloxista d'Asturies, Asociación Asturiana d'Amigos de la Naturaleza (ANA) y Coordinadora Ornitolóxica d'Asturies (COA) afirmó que nun va dexar d'oponese otra vuelta más al proyectu, y adelantó que la primer acción que va facer va ser la denuncia contra la construcción de la pista acordies col artículu 319 del Códigu Penal, qu'apauta como delitu les actuaciones ensin autorización n'espacios protexíos, con penes de seyes meses a trés años, multes y inhabilitaciones profesionales.