Los ecoloxistes denuncien el corte de castañales nel Parque de Redes

La Coordinadora Ecoloxista d’Asturies denunció la decisión de valtar 10.873 exemplares de castañales nel Parque Natural de Redes, anunciada nel BOPA'l 19 d'agostu pasáu. Aseguren que «supón un impautu grande ambiental nun espaciu protexíu».

L'asociación conservacionista amosó la so esmolición por estes nueves valtes nel conceyu de Casu, que de siguir asina "va quedar ensin les castañales" asitiaes nos montes públicos del Parque Natural de Redes, según recueyen nel so comunicáu. Reclamen al Principáu más información sobre los posibles proyeutos de restauración y destaquen el impautu ambiental grande que va causar esta decisión nuna redolada protexida que foi declarada Reserva de la Biosfera pola UNESCO.

Tomás Cueria, alcalde de Casu, defiende'l valtu de castañales dientro del plan de saneamientu (Plan Téunico de Xestión de los Castañeos) impulsáu pola Conseyería de Agroganadería y Recursos Autóctonos, que tien como oxetivu remocicar les mases de castañales pa lluchar contra la enfermedá del chancro. El plan empecipió nos montes d'utilidá pública d'Allende y Bañante y Guariza d'Abantro, y agora arrobinóse al monte de Vega de Cobo y Peña de Rosques.

Según el rexidor casín, el 25 per cientu del dineru xeneráu pola venta de los árboles y l'aprovechamientu maderable de trés montes del conceyu (un importe de 121.040 euros) va quedar nel monte y va dedicase a tratamientos silvícolas y de rehabilitación, y convida a la Coordinadora a que visite los montes pa esplica-yos el plan d'aición.

Pela so parte, la Coordinadora Ecoloxista d’Asturies tarrez "que nestos tiempos de crisis económica, nin el Principáu nin el Conceyu, que ye quien cobra pola venta de madera, pongan dineru pa la recuperación forestal d'estos miles d'árboles valtaos" y considera "inaceptable" el valtu d'estos exemplares "ensin qu'esistan garantíes de la restauración d'esa masa forestal nos próximos meses". La zona afeutada de Casu alluga la mayor concentración de castañales públiques d'Asturies y el Parque Natural de Redes tien una gran importancia pa la fauna de la zona, yá que nél s'atopen la mayor parte de les especies que pueblen el monte cantábricu.