Los ecoloxistes d’Avilés denuncien desinformación sobre un proyectu de cantera n’Illas

El Colectivu Ecoloxista d'Avilés pidió-y a la Conseyería de Mediu Ambiente y Urbanismu del Principáu d'Asturies la paralización del espediente de tramitación de solicitú d'apertura d'una nueva cantera en La Reigada, nel conceyu d'Illas.

La solicitú, que vien fecha pola empresa Escavaciones Ortigoso, presenta, al paecer de los ecoloxistes, un impactu mui altu.

Ello ye que, según denuncia'l colectivu avilesín, anque'l proyectu de cantera pasó per periodu d'alegaciones como manda la llei, los vecinos afectaos pola esplotación nun tuvieron anuncia d'ello, procediendo tamién el Conceyu a la recalificación de los terrenos pa permitir l'usu industrial de los mesmos ensin que los vecinos tuvieren conocimientu d'ello.

El colectivu aprecia qu'hai "intención" nesta desinformación y argumenta amás que la cantera pue tener un impactu visual mui importante.

Ello ye qu'en cuantes abra, la cantera va vese dende tolos llugares del conceyu, y amás al allugase nuna cordal va ser más difícil el tapar esi impactu visual. D'otra manera, el llugar onde se quier mangar la cantera ye onde se forma la cuenca fluvial que furne d'agua a Illas y Corvera, tando ensin peritar l'efectu de la cantera sobre estos calces d'agua.

La molestia pa los vecinos xenerada pol tráficu de camiones, el ruíu de les esplosiones y otros efectos derivaos de la presencia de la cantera son tamién oxetu de la crítica del Colectivu, que reclama que se pare l'espediente y se faiga un segundu periodu d'información público con un estudiu pormenorizáu d'impactu y la participación de los vecinos