Los ecoloxistes califiquen d’error grave l’actuación col faisán de Mumián

Dempués de tener tiempu pa contrastar tola información y posicionamientos oficiales sobre l'asuntu, Amigos de la Naturaleza Asturiana (ANA) la Coordinadora Ornitolóxica Asturiana (COA) y el Colectivu Montañeru pola Defensa de los Picos d'Europa, trés de los grupos ecoloxistes más importantes d'Asturies dieron esti vienres una rueda de prensa na qu'asoleyaron la valoración conxunta d'estes tres entidaes sobre'l casu del faisán de Somiedu.

En primer llugar, los trés grupos quixeron dexar bien claro que naide nun los avisare de que diba facese la operación de prindar al animal pa llevalu a otra braña nin del desarrollu de la mesma. Esta operación, que se xustificó dende la Conseyería pol peligru que representaba pal animal mesmu la so presencia en Mumián, llugar de pasu de bien d'escursionistes a los que se dicía que'l gallu se dedicaba a atacar, nun tien xacíu nengún pa los ecoloxistes asturianos, que protestaron pol métodu emplegáu dende que se dieron les primeres noticies sobre l'asuntu.

La muerte del animal a los pocos díes de volver a soltalu acabó d'enraxonar al ecoloxismu asturianu, que centraba la so crítica per un llau nel criteriu de separtar al animal de los escursionistes, y non en llendar l'accesu de los ecursionistes al faisán y per otru'l fechu de que dempués d'una operación qu'entendíen que foi una chapuza se volviere a soltar al faisán nun llugar nel que nun había más animales de la mesma especie y al que yera fácil que l'exemplar nun s'adaptare.

Col ánimu encesu según diben sabiéndose más detalles del casu, el 19 d'abril, Amigos de la Naturaleza Asturiana punxo un pleitu nel xulgáu d'Instrucción de Grau por si'l casu del Faisán de Mumián podía ser constitutivu de delitu contra'l mediu ambiente o si podíen dase nicios de prevaricación.

Tres d'esto, el 22 d'abril la dirección Xeneral de Recursos Naturales convidó a dellos grupos naturalistes a una xunta pa esplicar el procedimientu que se siguiere. Ello resolvió delles duldes y malos entendíos, matizando les crítiques del mundu ecoloxista hacia l'alministración, pero los calificativos hacia la operación siguen siendo negativos.

La llectura final del casu que fain dende ANA, COA y el Colectivu Montañeru diz que l'actuación tuvo mal en cuantes que supunxo la muerte del animal y llama l'atención sobre los munchos flecos científicos y técnicos que quedaron sueltos al facela, pero sorraya que too ello ye namás un casu dientro d'una politica enquivocada.

Les organizaciones ecoloxistes entienden que na filosofía que se siguió al facer esta actuación pesó más la presión turística sobre'l llugar - más entovía cuando'l casu asocedió per Selmana Santa- qu'un criteriu con xacíu empobináu a mirar por una especie que, anque nun ta declarada en peligru d'estinción, cumple tolos criterios pa ello. Sobre esti particular, esplicóse na rueda de prensa que na xunta del día 22 d'abril na que'l Principáu esclarió dellos puntos sobre l'asuntu a les organizaciones interesaes yá se-yos prometió que diben facese los pasos formales pa esa declaración, anque ello nun ye abondo pa los intereses conservacionistes, y asina les trés organizaciones ya mencionaes y la Coordinadora Ecoloxista d'Asturies esixeron que xunta esa declaración venga tamién un plan de recuperación que sustituya al actual "plan d'habitat".