Los ecoloxistes avilesinos plantéguense denunciar la térmica énte la Unión Europea

El Colectivu Ecoloxista d'Avilés prepárase p'atacar contra'l proyectu de central térmica que la empresa Isolux plantega asitiar en Valliniello (conceyu d'Avilés) que cuenta con denunciar si ye preciso n'instituciones europees con tal de que nun se lleve alantre lo que pal colectivu diba ser un güelpe al mediu ambiente asturianu y a la dañada atmósfera avilesina, al asitiase la térmica a mui poca distancia de la ciudá.

Na defensa de la so postura contraria a la central de 400 MW a gas que quier llevar alantre Isolux, la Coordinadora diz que cola normativa nueva sobre calidá del aire que ta preparando'l gobiernu, que va remocicar d'equí a poco la Llei de Protección d'Ambiente Atmosféricu de 1972, la situación atmosférica en conceyu va facer que la térmica sía inviable y alvierte que, n'aplicación de lo que va mandar esta llei nueva, anque'l Ministeriu de Mediu Ambiente informare al favor de la central, diben ser ellos mesmos los que llevaren el casu énte la Unión Europea.

El colectivu afirma qu'Avilés perpasa, 311 díes al añu, los topes de contaminación qu'apauta la Unión Europea, y que, contra la imaxe que quier promocionase d'Avilés como ciudá llimpia tres del desanicie de la cabecera siderúrxica d'Ensidesa, la presencia de les bateríes de cok, antiguu resclavu del xigante estatal del aceru, la fábrica proyectada de fertilizantes y la tamién proyectada térmica puen facer qu'estos indicadores de contaminación vaigan a más. El colectivu pon el casu d'una central térmica a la que se-y refugó autorización en Sevilla como precedente pa lo que creen que pue asoceder n'Avilés. Ello ye que nunos díes en que ye noticia la entrada en vigor de la Llei Antitabacu, que quier acabar cola muerte de 50.000 persones tolos años por enfermedaes derivaes del consumu de tabacu, los ecoloxistes remembren que, acordies con datos de la UE, la contaminación atmosférica ye la causa 16.000 muertes prematures nel Estáu español.

Pela so parte, el grupu Isolux sigue alantre colos trámites pa la construcción de la central, siendo'l Ministeriu de Mediu Ambiente agora la institución encargada de facer la declaración d'impactu mediuambiental. La intención ye que la central entame a construyise nel 2007 y tea operativa nel 2009.