Los ecoloxistes avilesinos, indignaos poles acusaciones del Gobiernu sobre los datos de bencén nel aire

Mediu Ambiente negó los datos sobre l’aumentu de bencén nel aire daos conocer pol Coleutivu Ecoloxista d’Avilés, acusando a esta organización de “xenerar una alarma innecesaria”. L’asociación amosó la so indignación por esta postura.

La cifra que manexaben los ecoloxistes sobre l’aumentu de la cantidá d’esti hidrocarburu cíclicu volátil canceríxenu en seres humanos yera de cerca del 50 por cientu, una cantidá negada pol Gobiernu, que sitúa la medra de la contaminación por bencén nun 32 por cientu. Amás, un voceru de la Conseyería de Fomentu, Ordenación del Territoriu y Mediu Ambiente instó a les organizaciones ecoloxistes a “actuar con responsabilidá” y nun difundir “datos erróneos” que pudieren “xenerar una alarma innecesaria na población”.

La respuesta del Coleutivu Ecoloxista d’Avilés nun se fixo esperar y, nun comunicáu, manifestó que’l coleutivu, dende que se fundó hai 33 años, “nun falta a la verdá, nin crea alarma social. Lo que facemos ensin cobrar ye recoyer unos datos y informar d’ellos, porque nin el Principáu nin el Conceyu fáenlo cuando los datos nun son bonos”. “Ta claro que’l Principáu tien qu’enfrentase a la realidá de la contaminación del bencén, non falseala diciendo qu’equí nun pasa nada y que too ta bien, y que la culpa ye del Coleutivu Ecoloxista”, reclamen dende la organización.

Los datos difundíos polos ecoloxistes espeyen una realidá distinta del 32 por cientu anunciáu pol Gobiernu, que tamién sería una cifra más que preocupante, según comenten. Asina, señalen qu’en 87 díes –cantidá que podría ser muncho mayor al nun haber datos diarios de la estación de Llaranes–, se superaron los topes que marca la llexislación. Estos resultaos sorprenden nun añu nel que les bateríes d’Arcelor-Mittal d’Avilés tuvieron una actividá menor.