Los ecoloxistes asturianos acusen a los constructores d’apertar sobre los partíos políticos en víespora d’elecciones

Nueve entidades y grupos ecoloxistes asturianos emitieron ayeri un comunicáu en que refuguen la propuesta de la Confederación Asturiana de la Construcción (CAC) que demandaba la construcción d'ocho autovíes nueves n'Asturies. Los grupos conservacionistes afirmen que ye inaceptable que dicha propuesta se faiga en víespora de votaciones col oxetivu de buscar el beneficiu propiu apertando sobre los partíos políticos.

La Coordinadora Ecoloxista d'Asturies, Plataforma pa la Defensa de la Cordal Cantábrica, Amigos de la Naturaleza Asturiana, Coordinadora Ornitoloxica d'Asturies, Grupu Ornitoloxicu Mavea, Grupu Ecoloxista de Llangreu "La Llavandera" la plataforma pol baxu Navia, l'Asociación "La Cirigüeña" de Morcín y Colectivu Ecoloxista d'Avilés firmen el comunicáu en que soliciten a los candidatos electorales que nun consideren la propuesta de la CAC y qu'enconten los sos programes electorales nun "modelu sostenible". Los grupos conservacionistes aseguren que les autovíes que se proponen nun respunden a una necesidá social, sinon a la "rellación de l'alministración cola obra pública" nun momentu en que "les necesidaes de tresporte n'Asturies tán cubiertes de sobra". Los grupos ecoloxistes decátense de que la propuesta de la CAC coincide "curiosamente" con un frenazu na construcción de vivienda, qu'albidren que s'intenta "sustituyir cola obra pública" pa "caltener el negociu". Contra estes propuestes d'autovíes, los ecoloxistes piden la meyora de la xestión y la igua de les carreteres actuales y que s'apueste por sistemes de tresporte alternativos al coche particular.