Los ecoloxistes aleguen contra una nueva cantera en Castropol

La Coordinadora Ecoloxista d'Asturies presentó suxerencies al proyectu del Conceyu de Castropol de recalificar unos terrenos n’Anguiliero pa la instalación d'una nueva cantera nel Occidente.

Según esplicó la Coordinadora, la empresa Excavación Méndez plantegó l'apertura d'una cantera nuna superficie de cinco hectárees ente les poblaciones de Niserias y Capo, nel conceyu de Castropol, nunos terrenes rústicos de la so propiedá clasificaos anguaño como Suelo Non Urbanizable d'Especial Protección.
 
D’esti mou, taría prohibida la implantación d'industries estractivas, en toles sos modalidaes, sacante les concesiones vixentes, lo que nun ye'l casu.
 
"Recordemos al consistoriu qu'estes esplotaciones traen numberoses afecciones a la redolada onde se ponen, como la xeneración de nubes de partícules de polvu debío principalmente a los movimientos de tierra, según el pasu de vehículos o aumentu de la contaminación acústica", destacaron los ecoloxistes.
  
Amás la coordinadora alerta de que la estracción del material de la zona d'esplotación supón un aumentu de la inestabilidá de les fasteres onde se realicen les esplotaciones y que l'impactu que va sufrir la vexetación va ser importante en cuantes que se produz la eliminación total de les zones afectaes, amás de llendar la crecedera o rexeneración, al esistir  factores que los afecten negativamente mientres la esplotación.