Los ecoloxistes aleguen contra la cesión de terrén al Principáu pa la estación d'esquí del Puirtu Braña

La Coordinadora Ecoloxista d'Asturies presentó ayeri alegaciones en Conceyu d'Ayer contra la cesión de 766.135,26 m2 de suelu propiedá del Conceyu d'Ayer al Principáu d'Asturies col envís de qu'esti terrén s'emplegue na construcción de la estación d'esquí del Puirtu Braña.



El grupu ecoloxista defende que la cesión nun pue facese en cuantes qu'esi suelu ta afectáu pol Plan Xeneral d'Ordenación Urbana d'Ayer, un plan dafechu vixente y que s'aprebó entovía n'avientu del 2.003. Según la Coordinadora, el PXOU ayerán nun consiente la cesión de terrén pa usos que la Comisión d'Urbanismu y ordenación del Territoriu d'Asturies (CUOTA) nun consiente. L'alegación diz que les Normes Subsidiaries de planeamientu apauten qu'esti suelu ta catalogáu como non urbanizable y d'Especial Protección.

L'alegación apela igualmente a artículos de la Constitución Española p'argumentar que nun esiste interés público nin xeneral nel fechu de la cesión de terrenos, atechándose tamién nuna sentencia del Tribunal Supremu que pon xurisprudencia nel asuntu. Según la Coordinadora, los fines que se pretenden cola Estación d'Esquí, de calter turísticu y inmobiliariu nun s'axusten a los requisitos que manda la llei p'autorizar la cesión.

Nuna valoración aparte de les alegaciones la Coordinadora diz que la estación d'esquí va suponer un marafundiu de recursos públicos, nun llugar de gran valor natural, y dan anuncia de que van presentar tolos recursos posibles nel ámbitu rexonal, estatal y européu para paralizar "semeyante barbaridá" amparada pol Gobiernu Asturianu.