Los doce clasificaos pa la final del V ‘Sácame pola Pinta’ defenden les sos imitaciones en La Felguera

Esti domingu’l Teatru Nuevu de La Felguera acueye, con toles entraes escosaes, la gran final del V ‘Sácame pola Pinta’, el concursu d’imitadores d’artistes asturianos. Doce neñes y neños clasificaron depués de les sos bones actuaciones na semifinal y agora busquen el primer premiu consistente nuna grabación d'un CD y un vale.

Esti certame entamáu pol Grupu A Mansalva gana pesu añu a añu, con gran raigañu na cuenca’l Nalón, como amuesa la bona respuesta del públicu en tola competición. Dende va selmanes yá nun queden butaques llibres pa la final del domingu que, sicasí, va poder siguise dende casa pela web del concursu dende les 20 hores.

Los clasificaos pa la cita son Xune S. Rodríguez, imitando a WarCry (‘Tú mismo’); Naia García, Alexandra in Grey (‘Give me’); Lucía Díaz, a Eva Tejedor (‘Veite’); Simón Buelga, a Víctor Manuel (‘La romería’); Miguel Cayarga, a Melendi (‘Asturias’); Ariadna Díaz, a Marisa Valle Roso (‘Aquel besín que me diste’); Elva Vallina, a Ramón Blanco ‘Mon’ de Los Berrones (‘Chacho’); Paula Tauriño, a Beatriz (‘Tres no más’); Pilar González, a Leticia Baselgas de L-R (‘Xota Ḷḷaron’); Ainhoa García, a Mina Longo (‘Pescadores’); Nícer S. Rodríguez, a Rodrigo Cuevas (‘Rambalín); y Olegario Díaz, Alberto & García (‘Tierra de fuego’). Son los que superaron la semifinal de Sama entamada, con 16 participantes, y aspiren a llevar el premiu consistente na grabación d’un discu promocional de 4 cantares del repertoriu del artista imitáu nel concursu, nun estudiu de grabación profesional y acompañáu d’un instrumentu (pianu o guitarra), del que se van editar 100 unidaes en formatu CD con caxa de cartón (diseñu y maquetación), amás d’una tarxeta regalu pa consumir 600 euros en cualquier tienda de Mundo PC.

Pol fechu de participar na final, tolos imitadores van llevar una recompensa de 30 euros pa gastar nesta tienda informática y un llote de regalos. El xuráu va tar formáu por David Varela, María Cotiello, Ramón Blanco, Arantxa Nieto y Joaquín Pajarón.

Na semeya, un momentu de la edición pasada del concursu.