Los direutivos de los centros públicos de Primaria reconocen el valir social y educativu del enseñu d'asturianu

L’ALLA adelantó los datos de la investigación fecha por Isabel Hevia sobre’l valir cultural y educativu que-y atribuyen al enseñu del asturianu los direutivos de los centros públicos de Primaria. Los resultaos son “contundentes”, según Ana María Cano.

Esti estudiu, encargáu pola Academia de la Llingua Asturiana (ALLA) al Departamentu de Ciencies de la Educación de la Universidá d’Uviéu, en concreto a Isabel Hevia Artime, esperta que yá collaborara enantes cola institución académica, desarrollóse nel cursu pasáu ente los meses de marzu y mayu. La investigación 'Valir cultural y educativu de la escolarización de la Llingua Asturiana' consisitió nun cuestionariu en castellanu autoalministráu, aplicáu per mediu d’entrevista personal de mou presencial nes escueles, en 148 colexos de 63 conceyos escoyíos de forma aleatoria y estratificada d’ente un universu de 240. D’ellos, 85 son de la zona centru, 26 de les cuenques, 24 del occidente y 13 del oriente.

El 55,40 por cientu de les persones que respondieron foron direutores, por un 26,40 de xefes d’estudiu y un 10,10 por cientu de secretarios énte l’ausencia de los primeros, mentes qu’un 8,10 por ciento prefirió nun reflexar el so cargu nel cuestionariu. Un 58,10 por cientu de los encuestaos foron muyeres y la media d’edá foi “relativamente alta”, 48 años, con 22,7 años na docencia. Ocho de cada diez xestores manifestó conocer la llingua asturiana, un datu “bastante esperanzador al comprobase que nos equipos direutivos hai una base social que, de combinase con una política educativa afayadiza, favorecería una meyora de los niveles de conocencia del asturianu de los escolinos y, por tanto, tamién de la sociedá en xeneral”, afirma Hevia. Amás, un 66,90 por cientu afirmó emplegala na so vida diaria, mentes qu’un 13,5 por cientu dixo nun utilizala pese a conocela.

La esperta agrupó los resultaos finales en trés dimensiones d’análisis que faen referencia al valir cultural de la llingua, a la importancia que tien nel sistema educativa y na contribución de la so enseñanza al procesu de normalización llingüística. Les conclusiones que sacó del estudiu son que “el nivel de conocencia y usu del asturianu por parte de los equipos direutivos ye especialmente altu y tresmítenos la idea de que la llingua asturiana na vida de los centros pue tener una viabilidá inmediata, si se tomen les midíes alministratives afayadices”, y que “paez indiscutible’l valir social y educativu de la llingua asturiana según les opiniones de los direutivos de los centros públicos d’Educación Primaria d’Asturies; poro, réfugase dafechu cualquier decisión que ponga en peligru la so sobrevivencia na vida pública y escolar”.

D’igual forma, apunta que “los xestores piensen que la presencia del asturianu nel currículum ye rentable dende’l puntu de vista de la so rellación con otres árees del currículum, y n’alquisición de competencies básiques, siendo un motivu más pa la normalización nel sistema educativu asturianiu”. Tamién que los direutivos “camienten, de mou inequívocu, que la presencia de la llingua precisa d’un mayor compromisu de l’alministración educativa pa facese más efeutiva”, y que la oficialidá “contribuyiría a solucionar munchos de los problemes de la inclusión efeutiva del asturianu nel currículum, como pue ser la so presencia normal en toles etapes y niveles educativos, la xeneralización a tolos centros al marxe de la so titularidá y l’usu del asturianu como una llingua vehicular pal tratamiento de determinaos conteníos non llingüísticos”. Por último, Hevia destaca que “los resultaos de la investigación son coherentes dafechu colos estudios sociollingüísticos fechos n’Asturies nos últimos años”, pero que, amás, “tien la importancia de que ta focalizada nun ámbitu especialmente sensible como ye la de los equipos direutivos de los centros públicos”.

Pela so parte, Cano afirmó que los resultaos qu’ufre esta investigación, que se espublizarán de manera completa nel ‘Lletres asturianes’ que saldrá pa primavera, “son contundentes y continúen lo que marcan los otros estudios sociollingüísticos”. Na so intervención, nun escaeció les dos demandes principales anguaño de la entidá que preside: la creación de la especialidá docente y que s’aproveche la entrada de la LOMCE pa regular la enseñanza de Llingua Asturiana y Gallego-asturiano nes escueles, dos pasos que tán nes manes de la Conseyería d’Educación, Cultura y Deporte. Otra manera, l’ALLA aportó los datos d’escolarización d’asturianu nel cursu pasáu en Primaria, etapa donde la materia ye voluntaria: en total hai 17.298 escolinos dando clase de Llingua Asturiana o Gallego-asturianu en 226 colexos del país, siendo’l 53,96 por cientu’l porcentaxe d’alumnos qu’estudien l’asignatura.

Resultaos de la muestra

El cuestionariu utilizáu nesta investigación ta compuestu por 16 afirmaciones sobre la Llingua Asturiana –na zona del Eo-Navia, éstes refiérense al gallego-asturiano–, cola opción d’escoyer cuatro respuestes: ‘nada de acuerdo’, ‘poco de acuerdo’, ‘bastante de acuerdo’ y ‘muy de acuerdo’. Les que destacó Hevia, por interesantes, son les siguientes:

-‘L’asturianu ye un valor cultural d’especial importancia p’Asturies’: 57,40 por cientu, mui d’alcuerdu; un 37,20, abondo d’alcuerdu; un 4,1, poco d’alcuerdu; y un 1,40 por cientu, nada d’alcuerdu. “Los xestores que participen nel estudiu tán concienciaos acerca del valir de la llingua asturiana como una seña d’identidá cultural”, afirma.

-‘Merez la pena que los escolinos y escolines conozan, aprenda y utilicen l’asturianu’: 61,50 por cientu, mui d’alcuerdu; un 33,80, abondo d’alcuerdu; un 3,40 por cientu, poco d’alcuerdu; y un 1,40, nada d’alcuerdu. “Les posiciones contraries al so conocimientu y usu, malpenes algamen un 5 por cientu de les respuestes”, apunta.

-‘Ye lóxico que l’asturianu forma parte del currículum escolar n’Asturies, como asocede coles sos llingües n’otres comunidaes billingües del Estáu’: un 54,70 por cientu, mui d’alcuerdu; un 36,50, abondo d’alcuerdu; un 5,40, poco d’alcuerdu; y un 2,70, nada d’alcuerdu. “Ésta ye una de les afirmaciones más interesantes, yá que, al traviés d’ella, los encuestaos asitiénse a favor o en contra de la enseñanza de la llingua, y los resultaos son bastante claros”, resalta.

-‘Les lleis educatives han de garantizar una presencia normal del asturianu nel sistema educativu d’Asturies: 54,10 por cientu, mui d’alcuerdu; un 39,90, abondo d’alcuerdu; un 4,10, poco d’alcuerdu; y un 2, nada d’alcuerdu. “El 94 por cientu de los xestores tán a favor, un resultáu de vital importancia nel contestu actual, tres l’aprobación de la LOMCE”, señala.

-‘L’asturianu ha estudiase de manera coordinada col castellán y la llingua estranxera’: 39,90 por cientu, mui d’alcuerdu; un 44,60, abondo d’alcuerdu; un 14, poco d’alcuerdu; y un 2, nada d’alcuerdu. “El 84,5 por cientu de los xestores allúgase a favor de la idea d’una coordinación interllingüística, dando-y un mayor pesu a la enseñanza de la Llingua Asturiana”, esplica.

-‘L’asturianu habría tar más sofitáu pola alministración educativa pa una meyor implantación nos centros’: 52,70 por cientu, mui d’alcuerdu; un 35,80, abondo d’alcuerdu; un 7,40, poco d’alcuerdu; y un 2,70, nada d’alcuerdu. “El sofitu de l’alministración educativa ye fundamental pal afitamientu de la Llingua Asturiana na enseñanza y los xestores de los centros son conscientes d’ello; con un mayor sofitu, la enseñanza de la Llingua Asturiana sería meyor”, diz.

-‘Ye necesaria la especialidá d’asturianu pal profesoráu, de mou que la so situación profesional seya homologable a la del restu de docentes’: 58,10 por cientu, mui d’alcuerdu; un 31,8, abondo d’alcuerdu; un 6,10 por cientu, poco d’alcuerdu; y un 2,70, nada d’alcuerdu. “La creación d’esta especialidá sería un primer acercamientu pa normalizar la situación d’estos profesionales” y la mayor parte de los xestores sofiten esta afirmación yá que “repercutiría mui positivamente non sólo na enseñanza de la llingua, sinón tamién nel funcionamientu de los centros.

-‘La co-oficialidá del asturianu ayudaría al afitamientu y dignificación d’esta área nel sistema educativu’: un 43,20 por cientu, mui d’alcuerdu; un 37,80, abondo d’alcuerdu; un 10,8, poco d’alcuerdu; y un 4,70 nada d’alcuerdu. “Nel contestu educativu, la oficialidá de la llingua percíbese como más necesaria al tratarse d’un espaciu estratéxico nel qu’esta figura diba tener una gran incidendia”, fina.

Na semeya, Cano y Hevia.